चीनले बनायो ओपन एआईको जस्तै शक्तिशाली मोडेल, अमेरिकालाई चुनौती

काठमाडौं — अमेरिकी चिप निर्यात रोक्दा पनि चीनले ओपन एआईजस्तै शक्तिशाली कृत्रिम बुद्धिमत्ता (एआई) मोडेल विकास गर्न सफल भएको छ ।

चीनियाँ एआई स्टार्टअप ‘डीपसिक’ ले सार्वजनिक गरेको नयाँ मोडेल ‘डीपसिक आर वान’ ले विश्वभर चर्चा बटुलिरहेको छ । गत जनवरी २० मा सार्वजनिक गरिएको डीपसिक आर वान मोडेललाई अमेरिकाले चुनौतीका रूपमा लिएको छ। ओपन सोर्समा आधारित यो मोडेल ओपन एआईका प्रतिस्पर्धी मोडेलहरूसँग तुलना गर्न लायक बनिसकेको छ ।

प्रतिबन्धबीच चीनको ठूलो उपलब्धि

अमेरिकाले चीनलाई अत्याधुनिक चिप निर्यातमा रोक लगाएपछि चीनको एआई प्रविधि विकासमा असर पर्ने अनुमान गरिएको थियो । तर डीपसिकले थोरै र कम लागतका चिपहरू प्रयोग गरी प्रतिस्पर्धात्मक च्याटबोट निर्माण गर्दै चीन एआई दौडमा पछाडि नरहेको सन्देश दिएको छ ।

विशेषज्ञहरूका अनुसार अमेरिकाले लगाएको प्रतिबन्धले चीनलाई नवप्रवर्तन (इन्नोभेसन) मा अझै प्रेरित गरेको छ । ओपन सोर्समा आधारित भएकाले डीपसिकले एआई क्षेत्रमा आफ्नो प्रभुत्व विस्तार गर्न सक्ने आँकलन गरिएको छ ।

डीपसिक आर वान बन्यो प्रतिस्पर्धी

डीपसिक आर वान मोडेलले गणित, कोडिङ र जटिल तर्क (रिजनिङ) जस्ता कार्यहरूमा उत्कृष्ट प्रदर्शन गरेको छ ।

• एआईएमई २०२४ गणित बेन्चमार्क

  • डीपसिक आर वान – ७९.८%
  • ओपन एआईको जिरो वान – ७९.२%

• म्याथ ५०० बेन्चमार्क

  • डीपसिक आर वान – ९७.३%
  • जिरो वान – ९६.४%

• कोडिङ बेन्चमार्क

  • डीपसिक आर वान – ९६.३%
  • जिरो वान – ९६.६%

यी नतिजाहरू अपूर्ण हुन सक्ने भए पनि डीपसिकले ओपन एआईलाई कडा प्रतिस्पर्धा दिने संकेत गरिसकेको छ । डीपसिकको सफलताले चीनको नवप्रवर्तन क्षमताको प्रमाण दिएको छ ।