प्रहरीको सेवा–सुविधा र जनशक्ति वृद्धि सरकारको प्राथमिकतामा : गृहमन्त्री गुरुङ

गृहमन्त्री सुदन गुरुङले नेपाल प्रहरीको सेवा–सुविधा वृद्धि, जनशक्ति थप तथा आधुनिक प्रविधि र पूर्वाधार विकास सरकारको प्राथमिकतामा रहेको बताउनुभएको छ । उहाँले भ्रष्टाचार, शक्तिको दुरुपयोग र पक्षपातमा संलग्न प्रहरी कर्मचारीलाई कुनै पनि हालतमा संरक्षण नगरिने स्पष्ट पार्नुभएको छ ।

नेपाल प्रहरीको ७१औँ प्रहरी दिवसका अवसरमा प्रहरी प्रधान कार्यालय, नक्सालमा आयोजित विशेष समारोहलाई सम्बोधन गर्दै गृहमन्त्री गुरुङले प्रहरीलाई व्यावसायिक, जिम्मेवार, निष्पक्ष र नागरिकमैत्री बनाउनुपर्नेमा जोड दिनुभयो ।

उहाँले सही काम गर्ने प्रहरी कर्मचारीलाई सरकारले पूर्ण साथ दिने उल्लेख गर्दै गलत कार्यमा संलग्न हुनेलाई संरक्षण नगर्ने बताउनुभयो । प्रहरीको सेवा–सुविधा वृद्धि, सम्मान अभिवृद्धि तथा कर्मचारीको ज्ञान र सीपको उपयोगका लागि सरकारले आवश्यक पहल गरिरहेको उहाँको भनाइ थियो ।

गृहमन्त्री गुरुङले प्रहरीको संगठन तथा व्यवस्थापन सर्वेक्षणमार्फत जनशक्ति थप गर्ने प्रस्ताव गरिएको जानकारी दिँदै प्रहरीका लागि आवश्यक पूर्वाधार र प्रविधिमा लगानी गर्नु सरकारको प्राथमिकता रहेको बताउनुभयो। हालैका विपद्का घटनामा उद्धारमा खटिएका सुरक्षाकर्मीका लागि जोखिम भत्ता तथा खाजा खर्चको व्यवस्था गरिएको पनि उहाँले उल्लेख गर्नुभयो।

नागरिकमैत्री प्रहरी सेवामा जोड

गृहमन्त्री गुरुङले उजुरी तथा जाहेरी दर्तादेखि अनुसन्धानसम्मका सबै प्रक्रियामा नागरिकलाई केन्द्रमा राखेर काम गर्न प्रहरी कर्मचारीलाई निर्देशन दिनुभयो। प्रहरीको बोलीचाली, आचरण र व्यवहार नागरिकमैत्री हुनुपर्ने उल्लेख गर्दै उहाँले निष्पक्ष र प्रभावकारी अनुसन्धानबाट मात्रै नागरिकको विश्वास जित्न सकिने बताउनुभयो।

“प्रहरीको वर्दी डर र त्रासको होइन, आशा, भरोसा र नागरिक–प्रहरी सहकार्यको प्रतीक बन्नुपर्छ,” उहाँले भन्नुभयो।

उहाँले शान्ति सुरक्षा कायम गर्ने क्रममा भिड नियन्त्रण तथा बल प्रयोग गर्दा आवश्यकता, अनुपातिकता र जवाफदेहिताका सिद्धान्त कडाइका साथ पालना गर्नुपर्नेमा जोड दिनुभयो। साथै, राज्यका संवेदनशील सूचना चुहाउने कार्यलाई उन्मुक्ति नदिइने स्पष्ट पार्दै संगठनभित्र अनुशासन, जिम्मेवारी र व्यावसायिक आचरण कायम राख्न निर्देशन दिनुभयो।

एआई, साइबर अपराध र डिजिटल फरेन्सिकमा दक्षता बढाउनुपर्ने

गृहमन्त्री गुरुङले प्रविधिको विकाससँगै अपराधका स्वरूप पनि परिवर्तन भइरहेकाले प्रहरीको प्राविधिक क्षमता विस्तार गर्नुपर्ने बताउनुभयो। कृत्रिम बौद्धिकता (एआई), डिजिटल फरेन्सिक, साइबर अपराध, वित्तीय अपराध अनुसन्धान तथा डीएनए फरेन्सिक प्रोफाइलजस्ता क्षेत्रमा प्रहरीको दक्षता अभिवृद्धि गर्नुपर्ने उहाँको भनाइ थियो।

त्यसैगरी, विपद् व्यवस्थापनलाई प्रभावकारी बनाउन पूर्वतयारी, आवश्यक तालिम, उद्धार सामग्रीको पर्याप्त व्यवस्था तथा सम्बन्धित निकायसँग समन्वय र सहकार्य बढाउन उहाँले निर्देशन दिनुभयो।

नयाँ पुस्ताले देशभित्रै आफ्नो भविष्य सुरक्षित र उज्ज्वल देख्न सक्ने वातावरण निर्माण गर्नु राज्यको दायित्व भएको उल्लेख गर्दै गृहमन्त्री गुरुङले प्रहरीको व्यवहार, निष्पक्ष अनुसन्धान र विपद्का बेला गरिने उद्धारले राज्यप्रतिको नागरिक विश्वास निर्धारण गर्ने बताउनुभयो।

“सही कार्यका लागि सरकार तपाईंहरूको साथमा छ, तर गलत कार्यको संरक्षण हुने छैन,” उहाँले भन्नुभयो। प्रहरी संगठनको सुधार र कर्मचारीको हितका लागि सरकारले अघि सारेका पहल आगामी दिनमा व्यवहारमै देखिने उहाँले विश्वास व्यक्त गर्नुभयो।