‘वाइल्डलाइफ फोटोग्राफर’ चुङ्बा शेर्पाको निधन

काठमाडौँ । चर्चित वाइल्डलाइफ फोटोग्राफर चुङ्बा शेर्पाको ६४ वर्षको उमेरमा निधन भएको छ ।

कलेजोसम्बन्धी समस्याका कारण उपचाररत शेर्पाको ग्रान्डी अस्पतालमा निधन भएको हो । सोलुखुम्बुको खुम्बु पासाङल्हामु गाउँपालिका–१, लुक्लाका स्थायी बासिन्दा शेर्पा एक सातादेखि भेन्टिलेटरमा राखेर उपचार गराइरहनुभएको थियो । उपचारकै क्रममा उहाँको निधन भएको खुम्बु पासाङल्हामु गाउँपालिका–१ का वडाअध्यक्ष फुनुरु शेर्पाले पुष्टि गर्नुभयो ।

शेर्पा नेपाली कांग्रेसमा आबद्ध थिए र खुम्बु पासाङल्हामु गाउँपालिकाका सभापति हुनुहुन्थ्यो । पूर्व चौँरीखर्क गाविस अध्यक्षका रूपमा समेत सेवा गरिसकेका शेर्पा पर्यटन व्यवसायसँगै राजनीतिमा पनि सक्रिय हुनुहुन्थ्यो । केही वर्षयता वाइल्डलाइफ फोटोग्राफीमा सक्रिय शेर्पा फोटोग्राफीसम्बन्धी विभिन्न राष्ट्रिय तथा अन्तर्राष्ट्रिय संस्थासँग आबद्ध थिए । उहाँका दुई छोरा र तीन छोरी छन् ।

शेर्पाको निधनले नेपाली फोटोग्राफी क्षेत्रमा ठूलो क्षति पुगेको छ ।