जेन–जी आन्दोलनका संयोजक सुदन गुरुङलाई आक्रमण गर्न कार्यकर्ताहरू सिंहदरबारदेखि घरसम्मै 'फलो' गरिरहेकाे सुदन गुरुङकाे दाबी

जेन–जी आन्दोलन तथा हामी नेपालका संयोजक सुदन गुरुङले आफूलाई आक्रमण गर्ने उद्देश्यले एउटा समूहले पछ्याइरहेको दाबी गरेका छन् ।

उनले सिंहदरबारदेखि घरसम्मै अनुगमन गरिएको भन्दै गम्भीर चिन्ता व्यक्त गरेका छन् । मंगलबार बिहान सामाजिक सञ्जालमार्फत भिडियो सन्देश जारी गर्दै गुरुङले आफूलाई पछ्याउनेहरूलाई आफ्नो बाटोभन्दा टाढा बस्न आग्रह गरेका छन् । उनले भने, “हुँदाहुँदा अहिले मेरो घरसम्म पनि के भन्छ, पूरा आइराछ, मलाई खोजीखोजी आइराछ । मैले जुन दिन भेटेँ भने गाह्रो पर्छ है... गुरुङ सोझो छ भनेर सोच्नुभएको होला। म सोझो छैन है फेरि । म राम्रोमा राम्रो छु, नराम्रोमा म धेरै नराम्रो छु। त्यसैले मेरो सजेसन– मेरो बाटोभन्दा टाढा बस्नू ।”

साथै उनले अहिले मन्त्रिपरिषद्मा राम्रा मन्त्रीहरू पुगेको उल्लेख गर्दै, आफूलाई हमला गर्न लगाउने शक्ति राष्ट्र निर्माणतर्फ केन्द्रित हुनुपर्ने सुझाव पनि दिएका छन् ।