भ्रष्टाचारविरुद्ध कठोर कदम चाल्न सरकार पछि हट्दैन : प्रधानमन्त्री कार्की

प्रधानमन्त्री सुशीला कार्कीले भ्रष्टाचारविरुद्ध जुनसुकै हदसम्मको कठोर कदम चाल्न सरकार पछि नहट्ने स्पष्ट पारेकी छन् ।

मंगलबार सिंहदरबारमा आयोजित भ्रष्टाचारविरुद्धको २२ औँ अन्तर्राष्ट्रिय दिवसका अवसरमा आयोजित कार्यक्रममा सम्बोधन गर्दै प्रधानमन्त्री कार्कीले जेनजी आन्दोलनको जगमा गठन भएको अन्तरिम सरकारले सुशासनलाई प्राथमिकतामा राखी तीव्र गतिमा काम गरिरहेको बताएकी हुन् ।

प्रधानमन्त्री कार्कीले अहिलेको सरकार केवल चुनावी सरकार मात्र नभई सुशासनको मागसहित भएको जेनजी आन्दोलनको परिणामस्वरूप बनेको सरकार भएको उल्लेख गरिन् । उनले नियमित प्रशासनिक कार्यसँगै सुशासन स्थापित गर्न सरकारले उच्च प्राथमिकतामा काम गरिरहेको जानकारी दिइन् ।

उनले भनिन्, “जेनजीका माग र अपेक्षाअनुरूपका आशातीत उपलब्धि हासिल हुन समय लाग्ला, तर भ्रष्टाचारविरुद्ध जुनसुकै हदसम्मको कठोर कदम चाल्न पनि सरकार पछि हट्ने छैन । यसका लागि राज्यका स्थापित संयन्त्रहरू सक्रिय भइसकेका छन् ।”

प्रधानमन्त्री कार्कीले सरकारका कामबाट अत्तालिएर कतिपय तत्त्वहरूले प्रत्यक्ष वा परोक्ष रूपमा धम्कीसमेत दिइरहेको बताउँदै यस्तो अवस्थाबाट विचलित नहुन सम्बद्ध निकायका पदाधिकारी तथा राष्ट्रसेवक कर्मचारीहरूलाई आग्रह गरिन् । उनले कर्मचारी र पदाधिकारीहरूलाई निर्भीक भई आ–आफ्नो व्यावसायिक स्वतन्त्रता प्रयोग गर्दै कानुनअनुसार अघि बढ्न निर्देशन दिइन् ।