गणतन्त्र दिवस समारोहमा प्रधानमन्त्री बालेनले सम्बोधन नगर्ने, सम्बोधन गरिदिन राष्ट्रपतिलाई पत्र

काठमाडौँ । प्रधानमन्त्री बालेन्द्र शाहले गणतन्त्र दिवसको अवसरमा जेठ १५ गते टुँडिखेलमा आयोजना हुने विशेष समारोहलाई सम्बोधन नगर्ने भएका छन् । प्रधानमन्त्री तथा मन्त्रिपरिषद्को कार्यालयले राष्ट्रपति रामचन्द्र पौडेललाई सम्बोधन गर्न सिफारिस गर्दै पत्र पठाएको छ ।

प्रधानमन्त्री तथा मन्त्रिपरिषद्को कार्यालय स्रोतका अनुसार उक्त पत्रमा “संविधानको धारा ६६ को उपधारा (२) बमोजिम जेठ १५ गते गणतन्त्र दिवसको अवसरमा टुँडिखेलमा आयोजित विशेष समारोहलाई सम्बोधन गरिदिनुहुन सिफारिस गरिन्छ” भन्ने उल्लेख गरिएको छ । नेपालको संविधानको धारा ६६ को उपधारा (२) मा राष्ट्रपतिले संविधान वा संघीय कानुनबमोजिम कुनै निकाय वा पदाधिकारीको सिफारिसमा गर्ने कार्य मन्त्रिपरिषद्को सिफारिस र सम्मतिबाट हुने तथा त्यस्तो सिफारिस प्रधानमन्त्रीमार्फत पेस हुने व्यवस्था छ ।

संविधानमा सिफारिस प्रधानमन्त्रीमार्फत पेस हुने व्यवस्था भए पनि यसपटक प्रधानमन्त्री तथा मन्त्रिपरिषद्को कार्यालयले सीधै पत्रमार्फत सिफारिस गरेको जनाइएको छ ।

मन्त्रिपरिषद्ले प्रधानमन्त्री बालेन्द्र शाहकै नेतृत्वमा ‘गणतन्त्र दिवस मूल समारोह समिति’ गठन गरेको छ । समितिले कार्यक्रम सञ्चालनका लागि जिल्ला तथा सम्बन्धित निकायहरूमा आवश्यक पत्राचार गरिसकेको गृह मन्त्रालयका आन्तरिक व्यवस्थापन महाशाखा प्रमुख सहसचिव ऋषिराम तिवारीले जानकारी दिएका छन् ।

यसअघि गणतन्त्र दिवस समारोहमा राष्ट्रपतिको उपस्थितिमा प्रधानमन्त्रीले सम्बोधन गर्ने परम्परा रहँदै आएको थियो । तर यसपटक प्रधानमन्त्री स्वयंले सम्बोधन नगरी राष्ट्रपतिलाई सम्बोधन गर्न सिफारिस गरेपछि उक्त परम्परा तोडिएको चर्चा सुरु भएको छ ।

राष्ट्रपति कार्यालय स्रोतले पनि प्रधानमन्त्री तथा मन्त्रिपरिषद्को कार्यालयबाट सम्बोधनका लागि सिफारिस पत्र प्राप्त भएको पुष्टि गरेको छ । प्रधानमन्त्रीले आफूले गर्ने सम्बोधनसमेत राष्ट्रपतिलाई सिफारिस गरेपछि राष्ट्रपति कार्यालय समेत असन्तुष्ट रहेको स्रोतको दाबी छ ।