अर्थमन्त्री स्वर्णिम वाग्लेमाथि हाल छानबिन आवश्यक छैन सरकारको निष्कर्ष

बजेटमा थपघट तथा करका दरमा हेरफेर गरिएको विषयमा अर्थमन्त्री डा. स्वर्णिम वाग्लेमाथि हाललाई छानबिन गर्न आवश्यक नरहेको निष्कर्ष सरकारले निकालेको छ ।

शुक्रबार मन्त्रिपरिषद् बैठकपछि सञ्चारकर्मीसँग कुरा गर्दै सरकारका प्रवक्ता तथा शिक्षा, विज्ञान तथा खेलकुदमन्त्री सस्मित पोखरेलले अर्थमन्त्री वाग्लेले उठेका प्रश्नबारे पर्याप्त स्पष्टीकरण दिइसकेको बताएका हुन् ।

अर्थ मन्त्रालय र अर्थमन्त्रीसँग सम्बन्धित विषयमा सरकारको धारणा सार्वजनिक गर्दै प्रवक्ता पोखरेलले अर्थमन्त्री वाग्लेले संघीय संसद् तथा संसदीय समितिमा आफूमाथि उठेका प्रश्नहरूको जवाफ दिइसकेको उल्लेख गरे ।

उनले अर्थमन्त्रीको स्पष्टीकरण नै पर्याप्त रहेको भन्दै हाललाई यस विषयमा थप कुनै प्रक्रिया आवश्यक नरहेको सरकारको निष्कर्ष रहेको बताए ।

“अर्थमन्त्रीज्यूले सदन र संसदीय समितिमा यस विषयमा स्पष्ट पारिसक्नुभएको छ । अहिलेका लागि थप कुनै कदम चाल्नुपर्ने आवश्यकता सरकारले महसुस गरेको छैन,” प्रवक्ता पोखरेलले भने ।

उनले भविष्यमा आवश्यक परे विगतमा जस्तै प्रधानमन्त्री तथा मन्त्रिपरिषद्ले उपयुक्त निर्णय लिन सक्ने पनि बताए ।

विधेयक निर्माण तथा कानुन संशोधनका विषयमा बोल्दै मन्त्री पोखरेलले सम्बन्धित मन्त्रालयबाट प्राप्त प्रस्तावहरू मन्त्रिपरिषद्मा छलफल र स्वीकृतिपछि मात्र सार्वजनिक गरिने जानकारी दिए ।

यसैबीच, माध्यमिक शिक्षा परीक्षा (एसईई) सँग जोडिएका अनियमितताका विषयमा मन्त्रालयमा हालसम्म कुनै औपचारिक जानकारी नआएको उनले बताए । तर परीक्षा सञ्चालनमा कुनै कमजोरी वा अनियमितता भएको पुष्टि भएमा संलग्न जोसुकैमाथि निष्पक्ष छानबिन गरी कानुनबमोजिम कारबाही गरिने उनले स्पष्ट पारे ।