रास्वपाको प्रथम ऐतिहासिक महाधिवेशन आजदेखि चितवनमा

राष्ट्रिय स्वतन्त्र पार्टी(रास्वपा)को प्रथम महाधिवेशन आज चितवनको भरतपुरमा सुरु हुँदैछ ।

अपरान्ह गेस्टहाउस चौरमा हुने समारोहमा सभापति रवि लामिछानेले महाधिवेशनको उद्घाटन गर्नेछन् ।रास्वपाले महाधिवेशनको सम्पूर्ण तयारी पूरा भएको जनाएको छ । हिजो बसेको केन्द्रीय समितिको बैठकले विधान मस्यौदा पारित गरेको छ भने महाधिवेशन प्रतिनिधिहरुको संख्या पनि टुंगो लगाएको छ । महाधिवेशनमा देश र विदेशबाट गरी करिव ४ हजार २ सय प्रतिनिधि सहभागी हुने छन् ।

तीन दिनसम्म चल्ने महाधिवेशनमा उद्घाटन सत्रपछि बन्दसत्र सुरु हुने छ । बन्दसत्रमा सभापति रवि लामिछानेको राजनीतिक प्रतिवेदन, महामन्त्री कविन्द्र बुर्लाकोटीको सांगठनिक प्रतिवेदन, कोषाध्यक्ष लिमा अधिकारीको आर्थिक प्रतिवेदन र विधान मस्यौदा प्रतिवेदन पेश हुने छ । विधान मस्यौदा पारित भएपछि महाधिवेशन नयाँ नेतृत्व चयनमा प्रवेश गर्नेछ ।उद्घाटन सत्रमा सभापति रवि लामिछानेसँगै प्रधानमन्त्री एवम् रास्वपा वरिष्ठ नेता बालेन शाहले सम्बोधन गर्नेछन् । रास्वपाले महाधिवेशनको उद्घाटन समारोहमा संसदमा प्रतिनिधित्व गर्ने विभिन्न दलका नेताहरुलाई पनि बोलाएको छ । अन्य दलका नेताहरुले पनि शुभकामना मन्तव्य दिनेछन् ।

महाधिवेशनमा सहभागी हुन अधिकांश प्रतिनिधिहरु हिजो नै भरतपुर पुगिसकेका छन् । महाधिवेशनका कारण भरतपुर रास्वपाको झण्डा र ब्यानरले सजिएको छ । भरतपुरका स्थानीयले समेत महाधिवेशनका सहभागीहरुलाई स्वागत गरिरहेका छन् ।

रवि लामिछानेले २०७९ असार ७ गते रास्वपाको घोषणा गरेका थिए । रास्वपा स्थापनाको पाँच महिनापछि भएको संसदीय निर्वाचनमा रास्वपाले २१ सिट जितेको थियो भने गत फागुन २१ गते भएको निर्वाचनमा झण्डै दुई तिहाई सिट जितेर रास्वपा देशकै सबैभन्दा ठूलो दल बनेको थियो ।

स्थापनाको ठीक चार वर्ष पुगेकै दिन प्रथम ऐतिहासिक महाधिवेशन गरेको रास्वपाले गत चैत १३ गतेदेखि देशको सत्ता सञ्चालनसमेत गरिरहेको छ ।