विश्व

भारतको महाराष्ट्रमा लगातार पाँचौं दिन भारी वर्षा, मुम्बईसहित आठ जिल्लामा रेड अलर्ट

राष्ट्रिय सरोकार

आइतबार, असार २१, २०८३

भारतको महाराष्ट्रमा लगातार पाँचौं दिन भारी वर्षा, मुम्बईसहित आठ जिल्लामा रेड अलर्ट

भारतको महाराष्ट्र राज्यमा लगातार पाँचौं दिनदेखि भारी वर्षा भइरहेको छ ।

निरन्तरको वर्षाका कारण मुम्बईसहित विभिन्न जिल्लाको जनजीवन प्रभावित बनेको छ । भारत मौसम विज्ञान विभाग (आईएमडी) ले आइतबार मुम्बईमा अत्यधिक वर्षाको सम्भावना रहेको भन्दै रेड अलर्ट जारी गरेको छ । मुम्बईसँगै रायगड, नासिक, पालघर, ठाणे, पुणे, सतारा र रत्नागिरी जिल्लामा पनि रेड अलर्ट जारी गरिएको विभागले जनाएको छ ।

महाराष्ट्रका मुख्यमन्त्री देवेन्द्र फडणवीसले सामाजिक सञ्जाल एक्समार्फत रेड अलर्ट जारी गरिएका क्षेत्रहरूको विवरण सार्वजनिक गर्दै मुम्बई, ठाणे, पालघर र पनवेलका लागि आपतकालीन हेल्पलाइन नम्बरसमेत सार्वजनिक गरेका छन् । उनले नागरिकलाई सतर्क रहन र आवश्यकबाहेक घरबाहिर ननिस्कन आग्रह गरेका छन् । पछिल्लो २४ घण्टामा मुम्बई र आसपासका क्षेत्रमा अत्यधिक वर्षा मापन गरिएको छ । कोलाबामा २ सय ६५.६ मिलिमिटर तथा सान्ताक्रुजमा २ सय २७.७ मिलिमिटर वर्षा रेकर्ड भएको छ ।

त्यस्तै, रायगड जिल्लाको माथेरानमा ४ सय ८ मिलिमिटर, भीरामा ३ सय ८६ मिलिमिटर तथा सांगली जिल्लाको डोंगरवाडीमा ३ सय ९८ मिलिमिटर वर्षा रेकर्ड भएको भारतीय सञ्चारमाध्यमहरूले जनाएका छन । लगातारको वर्षाका कारण केही स्थानमा जलमग्न अवस्था सिर्जना हुनुका साथै जनजीवन र यातायात सेवा प्रभावित भएको छ ।

स्थानीय प्रशासनले उद्धार तथा राहतका लागि आवश्यक तयारी अवस्थामा सुरक्षा निकायलाई परिचालन गरेको जनाएको छ।

प्रकाशित मिति: आइतबार, असार २१, २०८३

राष्ट्रिय सरोकारमा प्रकाशित सामग्री बारे कुनैपनि प्रतिक्रिया, सल्लाह, सुझाव वा कुनै सामग्री प्रकाशित गराउनुपरे rastriyasarokarnews@gmail.com मा पठाउनु होला ।

प्रतिक्रिया दिनुहोस्