सेक्युरिटी प्रेस खरिद प्रकरणमा अख्तियारको विस्तृत अनुसन्धान जारी

अख्तियार दुरुपयोग अनुसन्धान आयोगले सेक्युरिटी प्रेस खरिद प्रकरणमा विस्तृत अनुसन्धान जारी रहेको जनाएको छ ।

बिहीबार सिंहदरबारमा बसेको प्रतिनिधिसभाअन्तर्गतको राज्य व्यवस्था तथा सुशासन समितिको बैठकमा अख्तियारका निमित्त सचिव पद्म मैनालीले गोकुल बाँस्कोटासमेत आरोपित रहेको सेक्युरिटी प्रेस खरिदसम्बन्धी विषय विस्तृत अनुसन्धानकै क्रममा रहेको जानकारी दिनुभएको हो ।

मैनालीका अनुसार सार्वजनिक लेखा समितिबाट प्राप्त करिब १० वटा निर्देशनमध्ये सेक्युरिटी प्रेस खरिद प्रकरणलाई आयोगले अध्ययन गरिरहेको छ । त्यस्तै, राज्य व्यवस्था तथा सुशासन समितिका निर्देशनका आधारमा राष्ट्रिय ट्रमा सेन्टर र वीर अस्पतालसँग सम्बन्धित दुई–तीनवटा उजुरीसमेत विस्तृत अनुसन्धानको प्रक्रियामा रहेका छन् ।

उहाँले रौतहटको दुर्गा भगवती गाउँपालिका कार्यालयसँग सम्बन्धित विषयमा अनुसन्धान पूरा गरी मुद्दा दायर भइसकेको जानकारी दिनुभयो ।

मैनालीका अनुसार आर्थिक वर्ष २०७४/७५ बाहेक अन्य आर्थिक वर्षमा अदालतबाट फैसला भएका मुद्दामा ७० प्रतिशतभन्दा बढीमा कसुर कायम भएको छ । विशेष अदालतबाट कसुर कायम नभई सफाइ पाएका मुद्दामा आयोगले सर्वोच्च अदालतमा पुनरावेदन दर्ता गर्ने गरेको उहाँले बताउनुभयो ।