चालु आर्थिक वर्ष २०८३ को वैशाख १ देखि कात्तिक ३ गतेसम्म देशभर भएका विभिन्न विपद्का घटनामा ३ सय ८६ जनाको मृत्यु भएको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणको तथ्यांकअनुसार यस अवधिमा सबैभन्दा बढी मानवीय क्षति सर्पदंशका कारण भएको छ । उक्त तथ्यांकमा भोटेकोशी र बूढीगण्डकीमा आएको बाढीबाट भएको क्षति समावेश छैन ।
प्राधिकरणका अनुसार सात महिनाभन्दा कम अवधिमा देशभर ७ हजार ४३९ वटा विपद्का घटना भएका छन्। ती घटनामा २ हजार ४ सय ३३ जना घाइते भएका छन् भने १४ जना बेपत्ता छन्। विपद्का कारण ९ हजार ५ सय २५ परिवार प्रभावित भएका छन्।
यस अवधिमा सर्पदंशका १ हजार ६ सय २२ घटना भएका छन्। सर्पको टोकाइबाट १ सय १० जनाको मृत्यु भएको छ भने १ हजार ५ सय २५ जना घाइते भएका छन्। सर्पदंशका घटनाबाट १ हजार ६ सय २७ परिवार प्रभावित भएको प्राधिकरणको विवरणमा उल्लेख छ।
पहिरोबाट ७६ र बाढीबाट ४१ जनाको मृत्यु
सर्पदंशपछि पहिरोले सबैभन्दा बढी मानवीय क्षति पुर्याएको छ। वैशाख १ देखि कात्तिक ३ गतेसम्म देशभर पहिरोका १ हजार ७ सय ०९ घटना भएका छन्। पहिरोमा परी ७६ जनाको मृत्यु भएको छ भने तीन जना बेपत्ता र ७५ जना घाइते भएका छन्। पहिरोका कारण १ हजार ४ सय २६ परिवार प्रभावित भएका छन्।
त्यस्तै, यस अवधिमा बाढीका ४ सय ६० घटना भएका छन्। बाढीबाट ४१ जनाको मृत्यु भएको छ भने ११ जना बेपत्ता छन्। बाढीका कारण १ हजार ३ सय ४८ परिवार प्रभावित भएका छन्।
चट्याङका ३ सय ३३ घटनामा ३६ जनाको मृत्यु भएको छ भने २ सय ४ जना घाइते भएका छन्। चट्याङबाट ४ सय ३ परिवार प्रभावित भएका छन्।
आगलागीबाट २९ जनाको मृत्यु
प्राधिकरणको तथ्यांकअनुसार देशभर आगलागीका १ हजार ५ सय ७ घटनामा २९ जनाको मृत्यु भएको छ। ती घटनामा २ सय १९ जना घाइते भएका छन् भने १ हजार ६ सय ३९ परिवार प्रभावित भएका छन्।
लेक लाग्ने समस्यासम्बन्धी ७२ घटनामा २६ जनाको मृत्यु भएको छ भने ४८ जना घाइते भएका छन्। मानव–वन्यजन्तु द्वन्द्वअन्तर्गत जनावरको आक्रमणका ३९८ घटनामा २१ जनाको मृत्यु भएको छ भने २४१ जना घाइते भएका छन्।
यसैगरी, हिमपहिरोका छ वटा घटनामा १९ जनाको मृत्यु भएको छ भने एक जना घाइते भएका छन्। हावाहुरीका ५ सय ३७ घटनामा १६ जनाको मृत्यु भएको छ। हावाहुरीका कारण १ हजार ४९५ परिवार प्रभावित भएका छन्।
भारी वर्षाका ५८४ घटनामा सात जनाको मृत्यु भएको प्राधिकरणले जनाएको छ।
पछिल्लो २४ घण्टामा एक जनाको मृत्यु
प्राधिकरणका अनुसार कात्तिक २ गते बिहान १० बजेदेखि कात्तिक ३ गते बिहान १० बजेसम्म देशका २१ जिल्लामा २४ वटा विपद्का घटना भएका छन्।
यस अवधिमा आगलागीका १८ घटनामा एक जनाको मृत्यु भएको छ भने एक जना घाइते भएका छन्। पाँच जिल्लामा भएका सर्पदंशका पाँच घटनामा नौ जना घाइते भएका छन्। जनावरको आक्रमणबाट पनि एक जना घाइते भएका छन्।
पछिल्लो २४ घण्टामा विपद्का कारण करिब १८ लाख २ हजार ५०० रुपैयाँ बराबरको आर्थिक क्षति भएको छ। यस अवधिमा १६ वटा चौपाया मरेका वा क्षति पुगेको प्राधिकरणको विवरणमा उल्लेख छ। उद्धार तथा राहत कार्यका लागि १४१ जना प्रहरी परिचालन गरिएको थियो।
प्राधिकरणले मौसम परिवर्तनसँगै आगलागी र चिसोबाट हुन सक्ने जोखिमप्रति सतर्क रहन सर्वसाधारणलाई आग्रह गरेको छ। साथै, विपद्सम्बन्धी पूर्वसूचना तथा जानकारीका लागि आधिकारिक माध्यमको प्रयोग गर्न पनि प्राधिकरणले अनुरोध गरेको छ।
राष्ट्रिय सरोकार संवाददाता
-1791962140.jpg)
तिब्बती भाषा पढाउन भन्दै भारत लैजाँदै गरेका २५ बालबालिकाको बनबासाबाट उद्धार
बडादसैँ आजदेखि सुरु, घरघरमा घटस्थापना गरिँदै
पहिरोले नदी थुनिएर फुट्दा बूढीगण्डकीमा भीषण बाढी आएको प्रारम्भिक अनुमान
उखु किसानलाई डेढ अर्ब अनुदान दिन कृषिमन्त्री चौधरीले स्वीकृत गरिन् कार्यविधि
सन्तानप्रति समर्पित तराई–मधेशमा जितिया व्रत सुरू
लगातारको वर्षापछि सात नदीको जलसतह खतरा तह पार
