कुनै दल फुटाउने र मिलाउने मेरो काम हैन : प्रधानमन्त्री ओली

काठमाडौं । प्रधानमन्त्री केपी शर्मा ओलीले कुनै पनि राजनीतिक दल फुटाउने वा मिलाउने काम आफ्नो नभएको स्पष्ट पारेका छन् ।

सोमबार नेपाल पत्रकार महासङ्घका नवनिर्वाचित पदाधिकारीहरूलाई बालुवाटारस्थित प्रधानमन्त्री निवासमा बधाई तथा शुभकामना दिने क्रममा प्रधानमन्त्री ओलीले दल विभाजनसम्बन्धी अध्यादेश ल्याउन लाग्यो भनेर झुटो प्रचार गरिएकोमा गम्भीर ध्यानाकर्षण भएको बताए । उनले विगतमा दल विभाजनका लागि संसदीय दल र केन्द्रीय कमिटी दुवैमा ४० प्रतिशतको समर्थन आवश्यक पर्ने संवैधानिक व्यवस्थाका कारण कठिनाइ देखिएकाले सुधारका लागि कदम चालेको तर त्यसलाई पनि गलत अर्थ लगाइएको उल्लेख गरे ।

२० प्रतिशतको व्यवस्था र विरोध

प्रधानमन्त्री ओलीले विगतमा ४० प्रतिशतको व्यवस्थालाई संशोधन गरेर २० प्रतिशत सांसदको समर्थनमा दल विभाजन हुने कानुन निर्माण गर्नेहरूकै विरोध अहिले भइरहेको स्मरण गराए। तर, आफूले कुनै दल फुटाउने उद्देश्य नराखेको उनको भनाइ छ ।

प्रधानमन्त्रीले मुलुकको विकास र जनताको सेवालाई ध्यानमा राख्दै विभिन्न अध्यादेश राष्ट्रपतिसमक्ष सिफारिस गरेको बताए । उनले अध्यादेश जारी नभई झुटो प्रचार गरिएको भन्दै नेपाली पत्रकारितालाई यस्ता गतिविधिबाट जोगिन आग्रह गरे । उनले “राम्रो काम राति गर्न हुन्न भन्ने छ र ?” भन्दै जनताको हितका लागि आफू दिनरात नभनी काम गरिरहेको बताए ।

प्रधानमन्त्री ओलीले पत्रकार महासङ्घलाई प्रेस स्वतन्त्रता र जनताको सूचनाको हकको रक्षा गर्न आग्रह गरे ।

उनले कीर्ते र जाली काम रोक्न कानुन ल्याउने प्रतिबद्धता जनाउँदै पत्रकारहरूको पेसागत सुरक्षामा सरकारको भूमिका रहने बताए । सो अवसरमा महासङ्घका अध्यक्ष निर्मला शर्माले महिला अध्यक्षको नेतृत्वमा इतिहास रचेको उल्लेख गर्दै प्रेस स्वतन्त्रताका विषयमा सरकारको ध्यानाकर्षण गराइन् । महासचिव रामप्रसाद दाहालले प्रेस स्वतन्त्रताको संरक्षणमा सरकारको सक्रिय भूमिकाकाे माग गरेका थिए ।