समितिको बैठक दुई–तीन पटक भइसकेको, श्रमिक समस्याको समाधानमा गहन छलफल : परराष्ट्रमन्त्री राणा

वैदेशिक रोजगारमा देखिएका समस्या समाधान गर्न गठित मन्त्रीस्तरीय समिति दुई–तीनपटक बैठक बसेर गहन छलफल गरिसकेको परराष्ट्रमन्त्री नारायणी राणाले जानकारी दिएकी छन् ।

शुक्रबार प्रतिनिधि सभा अन्तर्गतको अन्तराष्ट्रिय सम्बन्ध समितिको बैठकमा बोल्दै मन्त्री राणाले गृहमन्त्री, श्रममन्त्री र परराष्ट्रमन्त्रीका साथै ती मन्त्रालयका सचिवहरूसमेत सहभागी रहेको समितिले समस्या विश्लेषण गरिरहेको बताइन् ।उनले भनिन्, "वैदेशिक रोजगारसम्बन्धी समस्या समाधानको उपाय प्रस्तुत गर्न समिति गठन गरिएको हो। समितिमा गृह, श्रम, परराष्ट्र मन्त्रालयका सचिव र मन्त्रीहरू सहभागी छन्।

हामी दुई–तीन राउण्ड बसिसकेका छौं ।" उनका अनुसार, कतिपय खाडी मुलुकहरूमा नेपाली कामदारहरू अन्य मुलुकका कामदारको तुलनामा कम तलबमा काम गर्न बाध्य छन् । युएईको उदाहरण दिँदै उनले भनिन्, “अरू मुलुकका कामदारले १ हजार रियाल पाउँछन् भने हाम्रा नेपालीले ८ सय मात्र पाउँछन् ।”

यस्ता समस्याहरूको समाधानका लागि समितिले श्रम मन्त्रालयलाई उपाय सुझाउने पनि राणाले बताइन् ।