सप्तरीमा धान जोगाउन गएका ६५ वर्षीय वृद्धको जंगली हात्तीको आक्रमणबाट मृत्यु

सप्तरीको कंचनरूप नगरपालिका–५, पिप्रा पूर्वमा जंगली हात्तीको आक्रमणबाट एक ६५ वर्षीय वृद्धको मृत्यु भएको छ ।

इलाका प्रहरी कार्यालय कंचनपुरका प्रमुख डीएसपी माधव प्रसाद काफ्लेले कंचनरूपका नारायण खङको हात्तीको आक्रमणले ज्यान गएको पुष्टि गरेका छन् । प्रहरीका अनुसार खङ राति आफ्नै खेतमा धान जोगाउन पुगेका थिए। चोरी–चकारी रोक्न उनी खेतमै बस्ने गरेका थिए । राति कै समयमा कोशी टप्पु वन्यजन्तु आरक्ष क्षेत्रतर्फबाट आएको जंगली हात्तीले उनी सुतिरहेको बेला आकस्मिक रूपमा आक्रमण गरी कुल्चिदिएको प्रहरीले जनाएको छ ।

आक्रमणपछि गम्भीर घाइते भएका खङलाई छिमेकीहरूले उद्धार गर्न खोजेपनि बचाउन नसकिएको र घटनास्थलमै उनको मृत्यु भएको प्रहरीले जनाएको छ ।

स्थानीयबासीले कोशी टप्पु क्षेत्रबाट गाउँतर्फ आउने जंगली हात्तीका कारण पटक–पटक जनधनको क्षति हुने गरेको छ ।