दिल्लीबाट चोरी गरी नेपाल भित्र्याइएको करिब २ करोड मूल्य बराबरको गरगहना र नगद बरामद, तीन जना पक्राउ

धनगढी | भारतको दिल्लीबाट चोरी गरी नेपाल भित्र्याइएको करिब दुई करोड रुपैयाँ मूल्य बराबरको हिरा, मोती, सुनचाँदीका गरगहना तथा नगद नेपाल प्रहरीले बरामद गरेको छ ।

सुदूरपश्चिम प्रदेश प्रहरी कार्यालय धनगढीका अनुसार तीन महिनाअघि (फागुन १३ गते) भारतको दिल्लीस्थित राजेन्द्रनगरका संजयकुमार माखीजाको घरबाट करोडौँ मूल्य बराबरको धनसम्पत्ति चोरी भएको थियो । उक्त घटनामा संलग्न रहेको आरोपमा बाजुराका उपेन्द्र रावतसहितको समूह नेपालमा फरार रहेको अवस्थामा अनुसन्धान अघि बढाइएको थियो ।

उजुरीपछि अनुसन्धान सुरु गरिएको र लामो खोजतलासपछि उपेन्द्र रावत, बाजुराको खप्तड छान्ना गाउँपालिका–३ का लोकेश धामी र अछामको साँफेबगर नगरपालिका–४ का अर्जुन सुनारलाई विभिन्न स्थानबाट पक्राउ गरिएको प्रदेश प्रहरी कार्यालयका प्रहरी निरीक्षक महेश शाहीले जानकारी दिए ।

उनका अनुसार चोरी गरिएका गरगहना तथा नगद उनीहरूले आफन्तका घरमा लुकाएर राखेको अवस्थामा बरामद गरिएको हो। बरामद सामग्रीमा हिरा, सुनचाँदीका गरगहना, विभिन्न कम्पनीका घडी तथा विभिन्न देशका मुद्रासमेत समावेश छन् ।

प्रहरीले हालसम्म करिब २ करोड १० लाख रुपैयाँभन्दा बढी मूल्य बराबरका सामग्री बरामद गरी सम्बन्धित उजुरीकर्तालाई बुझाइसकेको जनाएको छ। बरामद सम्पत्तिमा मात्र १ करोड ३४ लाख रुपैयाँ बराबरका १२ वटा घडी, ४३ लाख ३३ हजार रुपैयाँभन्दा बढीका सुनका गरगहना, १५ लाख ५६ हजार बराबरका हिरा तथा सुनका रिङ, २ लाख १५ हजार रुपैयाँ बराबरका चाँदीका गरगहना र करिब १२ लाख ९० हजार रुपैयाँ नगद रहेको प्रहरीले जनाएको छ ।

प्रदेश प्रहरी कार्यालयका प्रमुख डिआइजी ओमबहादुर रानाका अनुसार चोरीमा संलग्न मुख्य आरोपी भने अझै फरार छन् । फरार आरोपीको साथमा अझै ठूलो परिमाणमा चोरीको सम्पत्ति हुन सक्ने अनुमानसहित खोजी कार्य जारी रहेको प्रहरीले जनाएको छ ।

प्रहरीले यस घटनामा विभिन्न जिल्ला प्रहरी कार्यालयसँग समन्वय गरी अनुसन्धान अघि बढाएको बताउँदै फरार आरोपी छिट्टै पक्राउ पर्ने विश्वास व्यक्त गरेको छ ।