धनुषामा पेस्तोल र गोलीसहित दुई युवक पक्राउ

धनुषाको जनकपुरधाम उपमहानगरपालिका–९ थापा चौकस्थित एक होटलबाट प्रहरीले पेस्तोल र गोलीसहित दुई जनालाई पक्राउ गरेको छ ।

जिल्ला प्रहरी कार्यालय धनुषाबाट खटिएको टोलीले गोप्य सूचनाका आधारमा होटलमा खाना खान आएका दुई युवकसँग हतियार रहेको आशङ्कामा छापा मारेर उनीहरूलाई पक्राउ गरेको हो ।

पक्राउ पर्नेमा धनुषाको मुखियापट्टी मुसहनियाँ गाउँपालिका–४ निवासी २० वर्षीय अमन यादव र धनुषाकै हंसपुर नगरपालिका–६ सोनीगामा निवासी १८ वर्षीय सुधिर मुखिया रहेका छन् ।

जिल्ला प्रहरी कार्यालय धनुषाका निमित्त प्रवक्ता प्रहरी निरीक्षक मनोज यादव का अनुसार पक्राउ परेका दुवै जनाबाट एक थान पेस्तोल, त्यसको म्यागजिन, ९ एमएम केएफ लेखिएको एक थान गोली र ७.६५ एमएम केएफ लेखिएका तीन थान गोली बरामद गरिएको छ ।

प्रहरीका अनुसार होटलमा खाना खान आएका उनीहरूबारे गोप्य सूचना प्राप्त भएपछि खटिएको टोलीले चेकजाँच गर्दा हतियार फेला परेको हो । पक्राउ परेका दुवै जनामाथि हातहतियार तथा खरखजाना सम्बन्धी कसुरमा थप अनुसन्धान भइरहेको प्रहरीले जनाएको छ ।