पोखरीया नगरपालिका २ का चन्दन कुमार मिश्रमाथि भ्रष्टाचारको आरोपमा विशेष अदालतमा आरोपपत्र दायर

पर्साको पोखरीया नगरपालिका वडा नं.२ का चन्दन कुमार मिश्रमाथि घुस तथा रिसवत लिई भ्रष्टाचार गरेको मुद्दामा प्रतिकूल बकपत्र गरेको आरोपमा अख्तियार दुरूपयोग अनुसन्धान आयोगले विशेष अदालत, काठमाडौंमा आरोपपत्र दायर गरेको छ ।

साइबर ब्यूरो भोटाहिटीका तत्कालीन प्रहरी निरीक्षक बुद्धि प्रसाद सुवेदीले घुस लिई भ्रष्टाचार गरेको आरोपमा चन्दन कुमार मिश्रलाई सरकारी साक्षीको रूपमा पेश गरेका थिए । अनुसन्धानको क्रममा मिश्रले आयोगका अनुसन्धान अधिकृतसँग गरेको बयानको प्रतिकूल बकपत्र गरेपछि उक्त आरोप प्रमाणित भएको हो ।

आयोगको अनुसन्धानमा मिश्रले तत्कालीन प्रहरी निरीक्षक सुवेदीलाई साइबर अपराध मुद्दा मिलाइदिन ९९ हजार रूपैयाँ घुस दिएको अख्तियारद्वारा जारी विज्ञप्तीमा भनिएकाे छ । मिश्रलाई भ्रष्टाचार निवारण ऐन, २०५९ अनुसार दफा ३ को उपदफा (३) अन्तर्गत मुद्दा दायर गरी बिगो ९९ हजार रूपैयाँ र कैद सजायको माग गरिएको अख्तियार दुरूपयोग अनुसन्धान आयोगका प्रवक्ता नरहरि घिमिरेद्वारा जारी विज्ञप्तीमा भनिएकाे छ ।