लगातारको वर्षापछि सात नदीको जलसतह खतरा तह पार

लगातारको वर्षाका कारण देशका विभिन्न नदी तथा खोलामा जलसतह बढेको छ ।

बाढी पूर्वानुमान महाशाखाका अनुसार सातवटा नदी तथा खोलाको जलसतह खतरा तह पार गरेको छ । जल तथा मौसम विज्ञान विभागले नदीको अवस्था नियमित निगरानी गरिरहेको जनाएको छ । महाशाखाका अनुसार म्याग्दीको मंगलघाटस्थित म्याग्दीखोला, पर्वतको मोदीबेनीस्थित कालीगण्डकी, लमजुङको गरमबेसीस्थित चेपे खोला, चितवनको कालीखोलास्थित त्रिशूली, देवघाटस्थित नारायणी तथा बनकट्टास्थित रिउ खोलामा जलसतह खतरा तह पार गरेको हो ।

म्याग्दीखोलाको जलसतह ५.४२ मिटर पुगेको छ। उक्त स्थानमा सतर्कता तह ३.६ मिटर र खतरा तह ४.५ मिटर रहेको छ । त्यस्तै, चितवनको कालीखोलामा जलसतह १०.३४ मिटर पुगेको छ। उक्त स्थानमा सतर्कता तह ७ मिटर र खतरा तह ८.२० मिटर रहेको छ। बाँके, पाल्पा, म्याग्दी, बागलुङ, तनहुँ, लमजुङ, चितवन, मकवानपुर, काभ्रे र कपिलवस्तुका विभिन्न खोला तथा नदीमा समेत जलसतह बढेर सतर्कता तह पार गरेको महाशाखाले जनाएको छ ।

नदी तथा खोलाको जलसतह बढेसँगै तल्लो तटीय क्षेत्रका बासिन्दालाई सतर्क रहन आग्रह गरिएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले नारायणी नदीका सहायक नदीहरूमा उच्च सतर्कता अपनाउन आग्रह गरेको छ ।

जल तथा मौसम विज्ञान विभागको नदी अनुगमन प्रणालीमा म्याग्दी, कालीगण्डकी, चेपे, त्रिशूली र नारायणीसहित विभिन्न नदीको जलसतह निरन्तर निगरानी भइरहेको छ ।