लस एन्जलसमा भीषण डढेलो, १० जनाको मृत्यु

काठमाडाैँ । क्यालिफोर्नियाको लस एन्जलस र आसपासका क्षेत्रमा फैलिएको भीषण डढेलोका कारण कम्तीमा १० जनाको मृत्यु भएको छ ।

आगलागीका कारण लस एन्जलसको ठूलो भाग भग्नावशेषमा परिणत भएको छ । यस अवस्थालाई मध्यनजर गर्दै क्यालिफोर्नियाको नेसनल गार्डका सैनिकहरूलाई प्रभावित क्षेत्रमा परिचालन गर्ने तयारी गरिएको छ ।

लस एन्जलस काउन्टी मेडिकल एक्जामिनरले बिहीबार अबेरसम्म १० जनाको मृत्यु भएको पुष्टि गरेका छन् । आगो निभाउने प्रयास रातभर जारी रहेको छ । पानी छर्किने हेलिकोप्टर प्रयोग गरेर अग्निनियन्त्रकहरूले आगो नियन्त्रण गर्ने प्रयासलाई तीव्रता दिएका छन् । सुस्त हावाले आगो निभाउने अभियानलाई केही राहत दिएको भए पनि नयाँ आगलागीहरूको जोखिम कायमै रहेको अधिकारीहरूले बताएका छन् ।

प्यासिफिक पालिसाडेस आसपासको करिब २० हजार एकड क्षेत्र डढेलोको चपेटामा परेको छ भने अल्टाडेना क्षेत्रमा अर्को डढेलोले १३ हजार ७०० एकड जमिन जलेर नष्ट गरेको छ। अग्निनियन्त्रकहरूले प्यासिफिक पालिसाडेसमा लागेको आगोको ६ प्रतिशत परिधिमा नियन्त्रण गर्न सफल भएको जनाएका छन् ।

लस एन्जलस काउन्टीका शेरिफ रोबर्ट लुनाले रातको समयमा कफ्र्यू लगाउने योजना रहेको र नेसनल गार्डका सैनिकहरूले प्रभावित क्षेत्रमा गस्ती गरिरहेको बताएका छन् । उनले उद्धार क्षेत्रमा अनाधिकृत रूपमा प्रवेश गर्ने जो कोहीलाई परिचयपत्रको आधारमा पक्राउ गरिने जानकारी दिएका छन् ।

क्यालिफोर्नियाका गभर्नर गेभिन न्युसमले डढेलो प्रभावित क्षेत्रमा शान्ति कायम राख्न र लुटपाट रोक्न हजारौं नेसनल गार्डका सैनिक र सरकारी कर्मचारीलाई तैनाथ गरिएको बताएका छन् । गभर्नर न्युसमले समुदायको सुरक्षाका लागि राज्यका सबै स्रोतसाधन परिचालन गरिएको र प्रभावित क्षेत्रका बासिन्दाहरूलाई सतर्क रहन आग्रह गरेका छन् ।