डा. निकोलस भुसाललाई ५० हजार धरौटीमा रिहा गर्न अदालतकाे आदेश

पोखरा । राष्ट्रिय स्वतन्त्र पार्टी (रास्वपा) का सभापति रवि लामिछानेको हिरासतको फोटो सार्वजनिक गर्ने डा. निकोलस भुसाललाई ५० हजार धरौटीमा रिहा गर्न अदालतले आदेश दिएको छ ।

कास्की जिल्ला अदालतका न्यायाधीश शंकरबहादुर राईको इजलासले शुक्रबार भुसाललाई धरौटीमा रिहा गर्न आदेश दिएको हो । हिरासतको फोटो सार्वजनिक भएपछि प्रहरीको भूमिकामाथि प्रश्न उठेपछि कास्की प्रहरीले साइबर अपराधको आरोपमा गत पुस ७ गते भुसाललाई नियन्त्रणमा लिएको थियो ।

तर अदालतले उनलाई हिरासतमा नराखी अनुसन्धान गर्न आदेश दिएपछि उनी रिहा भएका थिए । बिहीबार भुसाललाई पुनः पक्राउ गरेर शुक्रबार अभियोजन दर्ता गरिएको थियो। अभियोजन दर्तापछि उनको बयान लिने र थुनछेक बहस गरिएको थियो ।

कास्की जिल्ला सरकारी वकिल कार्यालयले भुसालविरुद्ध विद्युतीय कारोबार ऐनअन्तर्गतको कसुर (साइबर अपराध) मा १ लाख रुपैयाँ जरिवाना र ५ वर्ष कैद सजायको मागदाबी गर्दै अभियोजन पत्र दर्ता गरेको थियो ।