मधेश प्रदेश सभा अगाडि मुख्यमन्त्री सिंहको पुतला दहन

जनकपुरधाम । मधेश प्रदेश सभा भवन अगाडि बुधबार मुख्यमन्त्री सतीस कुमार सिंहको पुतला दहन गरिएको छ । प्रदेश सभामा प्रस्तुत कामकाजको भाषा सम्बन्धी विधेयकमा विभेद भएको भन्दै जनकपुरधामका युवाहरूले विरोध प्रदर्शन गरेका हुन् ।

प्रदर्शनकारीहरूले मगही भाषालाई विधेयकमा स्थान नदिएकोप्रति आपत्ति जनाउँदै मुख्यमन्त्रीको पुतला जलाएका हुन् । चार लाखभन्दा बढी मानिसहरूले प्रयोग गर्ने मगही भाषालाई विधेयकमा समावेश नगर्नु अन्यायपूर्ण भएको उनीहरूको दाबी छ ।

युवाहरूले मधेश प्रदेश सरकारले विधेयक नसच्याए थप कडा आन्दोलन गर्ने चेतावनी दिएका छन् । विरोध प्रदर्शनका क्रममा प्रदर्शनकारीहरूले “पहिचानवादी सरकार मुर्दावाद,” “मुख्यमन्त्री राजीनामा दे,” “मुख्यमन्त्री मुर्दावाद,” र “शिक्षा मन्त्री मुर्दावाद” जस्ता नारा लगाएका थिए ।

युवाहरूले भाषिक विभेद हटाउन र सबै भाषाहरूलाई समान स्थान दिन दबाब सिर्जना गर्ने उद्देश्यले आन्दोलन जारी राख्ने बताएका छन् ।