पाठेघरको मुखको क्यान्सरविरुद्ध एचपिभी खोप अभियान सातै प्रदेशमा पुग्याे

स्वास्थ्य तथा जनसङ्ख्या मन्त्रालयले किशोरीलाई पाठेघरको मुखको क्यान्सरविरुद्धको ‘ह्युमन पापिलोमा भाइरस’ (एचपिभी) खोप सातै प्रदेशमा पठाइसकेको छ ।

स्वास्थ्य सेवा विभागको आपूर्ति व्यवस्थापन महाशाखाका निर्देशक डा. पवनजङ्ग रायमाझीका अनुसार गाभी (भ्याक्सिन र खोपका लागि ग्लोबल एलायन्स) को सहयोगमा प्राप्त खोप देशभरका १६ लाख ८८ हजार ९०० किशोरीलाई उपलब्ध गराइनेछ ।  

महाशाखाका अनुसार, कोशी प्रदेशमा २,७५,१८० मात्रा, मधेश प्रदेशमा ३,८०,४६० मात्रा, बागमतीमा (हेटौँडा) १,२५,८०० मात्रा र भक्तपुरका लागि २,१८,२८० मात्रा खोप पठाइएको छ ।  
गण्डकी प्रदेशमा १,३०,८७० मात्रा, लुम्बिनीमा २,९८,९१० मात्रा, कर्णालीमा १,२४,४०० मात्रा, र सुदूरपश्चिम प्रदेशमा १,८७,१२० मात्रा खोप उपलब्ध गराइएको छ ।  

झापामा मात्र ५५,००० किशोरीलाई एचपिभी खोप लगाइने भएको छ । जिल्लाका १५ वटै स्थानीय तहमा कक्षा ६ देखि १० का किशोरीहरू र विद्यालयबाहिर रहेका १० देखि १४ वर्षका किशोरीलाई खोप दिने व्यवस्था गरिएको छ । माघ २२ देखि २९ गतेसम्म झापामा विशेष खोप अभियान सञ्चालन हुने स्वास्थ्य कार्यालय झापाका जनस्वास्थ्य अधिकृत प्रकाश पाठकले जानकारी दिए ।  

नेपालमा पाठेघरको मुखको क्यान्सरका कारण वार्षिक रूपमा चार महिलाको मृत्यु हुने गरेको छ । ह्युमन पापिलोमा भाइरस (एचपिभी) मुख्य कारण भएकाले यो खोपले ठूलो योगदान पुर्‍याउने विश्वास गरिएको छ । नेपालमा महिलाहरूमा पाठेघरको मुखको क्यान्सर सबैभन्दा बढी देखिने क्यान्सर हो ।