‘झोले न्यायाधीश’ टिप्पणी गरेका सांसद प्रभु शाहविरुद्ध अवहेलना मुद्दा दर्ता

काठमाडौँ । न्यायाधीशलाई ‘झोले न्यायाधीश’ भन्ने टिप्पणी गरेका कारण आम जनता पार्टीका अध्यक्ष तथा प्रतिनिधिसभा सदस्य प्रभु शाहविरुद्ध अवहेलना मुद्दा दर्ता गरिएको छ ।

रौतहट जिल्ला अदालतमा दर्ता गरिएको उक्त मुद्दा बौधिमाई नगरपालिकाका मेयर प्रदीपकुमार यादवले दायर गरेका हुन् । यादव सोही पार्टीबाट निर्वाचित जनप्रतिनिधि हुन् ।

सांसद शाहले केही समयअघि सामाजिक सञ्जाल फेसबुक मार्फत न्यायपालिकाप्रति टिप्पणी गरेका थिए । उनले गत पुस २९ गते फेसबुकमा लेखेका थिए, "नेताहरूको झोले न्यायाधीशले रौतहट बदनाम एवं अस्तव्यस्त भयो । बेईमान एवं अयोग्य न्यायाधीशहरूलाई छानबिनको दायरामा ल्याउन म सम्माननीय प्रधानन्यायाधीश ज्युको विशेष ध्यानाकर्षण गराउँछु ।"

पछिल्लो समय सांसद शाह र मेयर यादवबीच विवाद चुलिँदै गएको छ । सांसद शाहविरुद्ध अदालत परिसरमै ज्यान मार्ने धम्की दिएको आरोप समेत लागेको छ ।

यसअघि, मेयर यादवमाथि आक्रमण गरेको आरोपमा सांसद शाहका कार्यकर्ता गंगाराम बैठालाई अदालतले पुर्पक्षका लागि थुनामा पठाउने आदेश दिएको थियो । सो आदेशपछि सांसद शाहले सामाजिक सञ्जालमा न्यायपालिकामाथि टिप्पणी गरेका थिए ।