एनपीएलमा सट्टेबाजी गरेको आरोपमा १० जना पक्राउ

काठमाडौँ प्रहरी परिसरका प्रवक्ता पवन कुमार भट्टराईका अनुसार पक्राउ परेकाहरूले एनपीएल खेलमा अनधिकृत सट्टेबाजी सञ्चालन गर्दै करिब रु २ करोड ५ लाख बराबरको वित्तीय कारोबार गरेको प्रारम्भिक अनुसन्धानमा खुलेको छ ।

उनका अनुसार एनपीएलका विभिन्न खेलहरूलाई लक्षित गरी सञ्चालन गरिएको अवैध अनलाइन तथा प्रत्यक्ष सट्टेबाजी गतिविधि सम्बन्धी सूचना प्राप्त भएपछि प्रहरीले विभिन्न स्थानमा छापा मारेर अभियुक्तहरूलाई नियन्त्रणमा लिएको हो । प्रहरीका अनुसार नेपालकै प्रतिष्ठित फ्रेन्चाइज क्रिकेट लिग मानिने एनपीएलमा खेलमैदानदेखि बाहिरी क्षेत्रसम्म सुरक्षालाई उच्च प्राथमिकता दिइएको छ ।

प्रतियोगिता शान्तिपूर्ण रूपमा सञ्चालन गराउन करिब ४ सय सुरक्षाकर्मी परिचालन गरिएको प्रहरीले जनाएको छ । प्रहरीले अवैध सट्टेबाजीमा संलग्न अन्य व्यक्तिहरूको पहिचान र नेटवर्कबारे थप अनुसन्धान गरिरहेको जनाएको छ ।