पर्सा प्रहरीकाे मंसिर महिनाको प्रगति विवरण सार्वजनिक, जघन्य तथा गम्भिर अपराध २५ वटा सहित एक सय ५ वटा नयाँ मुद्दा दर्ता

जिल्ला प्रहरी कार्यालय पर्साले मंसिर महिनाकाे प्रगति विवरण सार्वजनिक गरेकाे छ । 

मंसिर महिनामा जिल्ला भरि १ सय ५ वटा वटा नयाँ मुद्दा दर्ता भएका छन्, जसमा जघन्य तथा गम्भिर प्रकृतिका अपराध २५ वटा रहेकाे पर्सा प्रहरीले जनाएकाे छ । यी मुद्दाहरूमा ६ जना बालिका सहित एक महिलाकाे जबरजस्ती करणीकाे घटना, विवाह सम्बन्धी कसुरका ४ वटा, बहुबिवाहका २ वटा, अपहरण तथा शरिर बन्धकका १ वटा, एकवटा बालयाैन दुरूपयाेग लगायतका रहेका छन् । 

यसैगरी महिला, बालबालिका र ज्येष्ठ नागरिकसँग सम्बन्धित १४ मुद्दाहरूमा पीडक विरुद्ध उजुरी दर्ता गरिएकाे पर्सा प्रहरीले जनाएकाे छ । महिला, बालबालिका र ज्येष्ठ नागरिकसम्बन्धी उजुरीमा घरेलु हिंसा ७७, सामाजिक हिंसा ९७ उजुरी दर्ता भएका छन् । पीडित र प्रतिवादीको उमेर समूह, उजुरीको प्रगति र मिलापत्र/अदालतमा पठाइएको विवरण समेत समावेश गरिएको छ ।

यसैगरी पर्सा प्रहरीले आर्थिक अपराध तथा बैंकिङ कसुरका २९ वटा, ठगी मुद्दाका २ वटा, अनुचित लेनदेनकाे एकवटा रहेका छन् । यसैगरी प्रहरीले अदालतबाट दाेषि रहेका तर सजाय भुक्तान बाँकी  मुद्दाका ८३ जना प्रतिवादी पक्राउ गरेकाे छ । विगत २० वर्षदेखि फरार रहेका २ सय जना प्रतिवादीलाई नियन्त्रणमा लिएर अनुसन्धान प्रकृया अघि बढाएको छ ।

पर्सा प्रहरीले मंसिर महिनामा राजस्व चुहावट र भन्सार छली नियन्त्रणमा उल्लेखनीय सफलता हासिल गरेको छ । यस क्रममा अवैध भन्सार छलीको क्रममा ७ कराेड ६१ लाख ५० हजार ८ सय ३७ रूपैयाँ बराबरका सामान बरामद गरेको छ । यसैगरी मंसिर महिनामा कुल २१ वटा विपद घटना भएको छ । जसमा २ चौपायाकाे मृत्यु भएकाे छ भने ७ जना व्यक्ति घाइते भएका छन् भने विपदबाट १ करोड ४१ लाख ५५ हजार बराबरको मालबस्तु जलेर नष्ट भएको पर्सा प्रहरीले जनाएकाे छ।

प्रहरीका अनुसार मंसिर महिनामा ५ सय २९ केजी लागूऔषध गाजाँ,१० के.जी. २ सय ग्राम चरेश, ५६ ग्राम खैरो हिरोइन र ७६ हजार १ सय ७० पिस ट्रामाडोल बरामद गरिएको हाे । यसले जिल्लामा लागु औषध नियन्त्रणमा प्रहरीको सक्रियता देखाएको छ ।

यसैगरी पर्सामा सवारी दुर्घटनाकाे ७४ वटा घटना भएको छ, जसमा २ जनाको मृत्यु र ९२ जना घाइते भएका थिए । यस क्रममा जिल्ला ट्राफिक प्रहरी कार्यालयले राजस्व संकलनको क्रममा एक हजार ४३ जनालाइर् कारवाही गर्दै १२ लाख ८३ हजार ५ सय रूपैयाँ संकलन गरेको छ ।

पर्सा प्रहरीले जनचेतनामूलक कार्यक्रम अन्तर्गत जनचेतना अभिवृद्धिका लागि १४ स्थानीय तहमा गरेर २ सय २८ वटा कार्यक्रम सञ्चालन गरेको छ । जसमा ७ हजार ५ सय ७९ जनाले सहभागीता जनाएका थिए । कार्यक्रममा महिला हिसां, आत्म हत्या न्यूनिकरण, लागु औषध सम्बन्धी जनचेतनामुलक कार्यक्रम, साईब क्राईम, दाईजो प्रथा, ट्राफिक नियम, सवारी दुर्घटना, जेब्रा क्रसिङ बाल श्रम, बहुबिवाह, मानव बेचबिखन, सरसफाई, बृक्षारोपन, रक्तदान लगायतका विषयमा जनचेतना फैलाएकाे थियाे । यसैगरी पर्सामा आन्दोलन, कोण सभा तथा धर्ना नियन्त्रणमा १ सय ३५ जना प्रहरी परिचालित भएकाे प्रहरीले जनाएकाे छ । 

यसका अलावा प्रहरी कर्मचारीहरूको मनोबल वृद्धिका लागि साप्ताहिक रिफ्रेसमेन्ट, मेसमा LED TV जडान, कार्यालय अगाडि Digital Board स्थापना, Smart Lighting सहितको चेकप्वाइन्ट कार्यान्वयन गरिएको प्रहरीले जनाएकाे छ ।