अवैध लागूऔषध सहित चार जना पक्राउ

देशभरबाट अवैध लागूऔषध सहित चार जना पक्राउ परेका छन् । मकवानपुर, मनहरी गाउँपालिका-८ सिमपानीबाट अवैध लागूऔषध गाँजा करिब ८० किलोग्राम सहित कैलाश गाउँपालिका-४ कालिकाटार बस्ने २२ वर्षीय छेटुप थिङलाई मंगलबार राति प्रहरीले पक्राउ गरेको छ ।

इलाका प्रहरी कार्यालय मनहरीबाट खटिएको टोलीले राक्सिराङ चैनपुरबाट हेटौंडातर्फ जाँदै गरेको बागमती प्रदेश ०६-००१ च ००६२ नम्बरको बोलेरो गाडी तलासी गर्दा उक्त परिमाणको गाँजा फेला पारी चालक थिङलाई नियन्त्रणमा लिएको हो ।

कैलाली, धनगढी उपमहानगरपालिका-२ त्रिनगर भन्सारबाट अवैध लागूऔषध खैरो हेरोइन जस्तो देखिने पदार्थ ८५० मिलिग्राम सहित सोही उपमहानगरपालिका-७ मनेहरा बस्ने २४ वर्षीय सन्दिप चौधरीलाई मंगलबार दिउँसो प्रहरीले पक्राउ गरेको छ । जिल्ला प्रहरी कार्यालय कैलालीबाट खटिएको टोलीले उनलाई उक्त पदार्थ सहित नियन्त्रणमा लिएको हो ।

यसैगरी, कैलालीको लम्कीचुहा नगरपालिका-१० चुहा बस्ने ५० वर्षीया कमला रावतलाई अवैध लागूऔषध चरेश जस्तो देखिने पदार्थ ७०० ग्राम र तराजु १ थान सहित मंगलबार राति प्रहरीले पक्राउ गरेको छ । इलाका प्रहरी कार्यालय लम्कीबाट खटिएको टोलीले उनको पसल तलासी गर्दा उक्त पदार्थ फेला पारी पक्राउ गरेको हो ।

झापा, मेचीनगर नगरपालिका-१३ अठारकठ्ठे बस्ने २५ वर्षीया लुबी कामाईलाई अवैध लागूऔषध ब्राउनसुगर जस्तो देखिने पदार्थ ४६० मिलिग्राम र नगद १५ हजार रुपैयाँ सहित मंगलबार राति प्रहरीले पक्राउ गरेको छ । प्रहरी चौकी चारआलीबाट खटिएको टोलीले उनको घर तलासी गर्दा उक्त पदार्थ फेला पारी पक्राउ गरेको हो ।

यस सम्बन्धमा प्रहरीले आवश्यक अनुसन्धान गरिरहेको छ ।