सर्लाहीमा गाँजा ओसारपसारका लागि एम्बुलेन्स प्रयोग, ५१ केजीभन्दा बढी गाँजासहित चालक पक्राउ

सर्लाहीमा लागुऔषध गाँजा ओसारपसारका लागि बिरामी बोक्ने एम्बुलेन्स प्रयोग हुँदै आएको खुलासा भएको छ ।

प्रहरीले हरिवन क्षेत्रबाट गाँजा बोकेको एम्बुलेन्स नियन्त्रणमा लिएपछि यस्तो  सार्वजनिक भएको हो । जिल्ला प्रहरी कार्यालय सर्लाहीका अनुसार हरिवन नगरपालिका–५, घुर्कौलीस्थित हिरालाल टोलमा चेकजाँचका क्रममा ज १ च १५५८ नम्बरको एम्बुलेन्सको पछाडिपट्टिको भागमा बोराभित्र लुकाइराखिएको ५१ किलो ५ सय ग्राम गाँजा बरामद गरेको हो । नेपाल रेडक्रस सोसाइटी, रामनगर बहुअर्वाको नाममा दर्ता रहेको सो एम्बुलेन्स प्रयोग गरी गाँजा ओसारपसार भइरहेको सूचना प्राप्त भएपछि प्रहरीले निगरानी बढाई नियन्त्रणमा लिएको जनाएको छ ।

एम्बुलेन्स चालक रौतहटको यमुनामाई गाउँपालिका–४, सरुअठा निवासी ३७ वर्षीय सुरेन्द्र राय यादवलाई प्रहरीले पक्राउ गरेको छ । बरामद गाँजाबारे थप अनुसन्धान भइरहेको सर्लाहीका प्रहरी उपरीक्षक योगेन्द्रकुमार खड्काले जानकारी दिएका छन् ।

यसअघि पनि शुक्रबार मात्र प्रहरीले लालबन्दी नगरपालिका–११, हीरापुरबाट ५२ केजी गाँजासहित एक पिकअप भ्यान र एक जनालाई नियन्त्रणमा लिएको थियो । प्रहरीका अनुसार सर्लाहीको चुरे क्षेत्रमा व्यावसायिक रूपमा गाँजा खेती हुँदै आएको र त्यहाँ उत्पादन हुने गाँजा बिक्रीका लागि भारततर्फ ओसारपसार हुने गरेको छ ।

पछिल्लो समय यस्ता अवैध गतिविधि रोक्न निगरानी कडा बनाइएको प्रहरीले जनाएको छ ।