मकर सङ्क्रान्तिमा गढीमाई मन्दिरमा बोकाको बलि

बारा जिल्लाको महागढीमाई नगरपालिका–१, बरियापुरस्थित गढीमाई मन्दिरमा यस वर्षको मकर सङ्क्रान्तिको अवसरमा भाकल अनुसार बोकाको बलि दिइएको छ ।

गढीमाईको पञ्चवर्षीय मेलामा भाकल बाँकी रहेकाहरूले मकर सङ्क्रान्तिको दिन बलि दिने परम्परा रहेको छ । बलिदानका लागि प्रसिद्ध गढीमाई मन्दिरमा केही भाकलकर्ताहरूले बोकाको बलि दिए भने कतिपयले परेवा उडाएका छन्। आज मन्दिरमा बलि दिनेको ठूलो भीड लागेको थियो ।

मकर सङ्क्रान्तिमा बलि दिन छुटेका भक्तजनले अब फागु पूर्णिमाको दिन बलि दिन पाउनेछन्। त्यसपछि गढीमाई मन्दिरमा बलिदान अर्को पञ्चवर्षीय मेला, २०८६ सालमा मात्रै हुनेछ ।

महागढीमाई नगरपालिकाका प्रमुख एवं मेला आयोजक समितिका संयोजक उपेन्द्र यादवका अनुसार माघ ५ गतेसम्म पञ्चवर्षीय मेला औपचारिक रूपमा समापन हुनेछ । माघेसङ्क्रान्तिको अवसरमा मन्दिर परिसरमा धार्मिक अनुष्ठान र सांस्कृतिक कार्यक्रम पनि आयोजना गरिएका छन् ।

आजको मेलामा नेपाल तथा भारतका विभिन्न स्थानबाट ठूलो संख्यामा श्रद्धालुहरूको सहभागिता रहेको आयोजक समितिले जानकारी दिएको छ ।