थारू समुदायले धुमधामका साथ मनाए माघी महोत्सव

मङ्गलवार देशभरि थारू समुदायले माघे सङ्क्रान्ति पर्व धुमधामका साथ मनाएका छन् ।

सूर्य धनु राशिबाट मकर राशिमा प्रवेश गर्ने दिनलाई मकर (माघे) सङ्क्रान्ति भनिन्छ । यस दिन उत्तरायण सुरू हुने भएकाले दिनभन्दा रात छोटो हुँदै जान्छ । धार्मिक विश्वास अनुसार स्नान, जप, तप, ध्यान, साधना र दानले पुण्य प्राप्त हुने मान्यता रहेको छ ।

पर्सा जिल्लाका छ वटा स्थानमा विशेष माघी महोत्सव आयोजना गरिएकाे थियो । वीरगंज महानगरपालिकामा माघी मूल समारोह समितिको आयोजनामा स्वीमिङपुलमा थारू समुदायको परम्परागत नृत्य, गीत र परिकारसहित नयाँ वर्ष २६३९ मनाइएको थियो । महोत्सवको सुरुआत घण्टाघरबाट स्वीमिङपुलसम्म प्रभातफेरीसहित थारू संस्कृति झल्किने झम्टा नृत्य, घाटो र सामाचकेवाका प्रदर्शनबाट गरिएको थियो ।

महागढीमाई नगरपालिकासहित बडनिहार खेलमैदान, औराहा पंचगावाँ, फरदहवा, सेढवा, र सुवर्णपुरमा एक दिने माघी महोत्सव आयोजना गरियो । पटेर्वासुगौली गाउँपालिकामा भने तीन दिने महोत्सव मनाइएको छ । महोत्सवमा थारू समुदायको राजनीतिक, सांस्कृतिक, र सामाजिक पहिचानसहित राज्यका निकायमा समानुपातिक समावेशी प्रतिनिधित्वको माग गरिएको माघी महोत्सवका संयोजक चौधरीले जानकारी दिए ।

थारू समुदायको विशेष परिकार घोङी, गङ्गटो, माछा, कुखुरा, भुजा, तिल लगायतका स्टल महोत्सवको आकर्षण बनेका थिए ।

माघे सङ्क्रान्तिमा धार्मिक विश्वास अनुसार स्नान, तिलको तेलले मालिस र तिलको दानलाई विशेष महत्व दिइन्छ । उत्तरायण सुरू हुने भएकाले यस दिनलाई पुण्यदायक मान्ने परम्परा छ ।