मोन्टी देसाईको भावुक बिदाई : प्रिय खेलाडी, लाखौँको सपना बोकेका छौ, बाउन्ड्री निकालिरहनु

काठमाडौँ । नेपाली राष्ट्रिय क्रिकेट टिमका मुख्य प्रशिक्षक मोन्टी देसाईले आफ्नो पदबाट बिदाई लिएका छन् । नेपाल क्रिकेट संघ (क्यान) ले उनको करार नवीकरण नगर्ने निर्णय गरेपछि उनले सामाजिक सञ्जालमार्फत नेपाललाई धन्यवाद दिँदै बिदाई सन्देश सार्वजनिक गरेका छन् ।

देसाईले आफ्नो फेसबुक स्टाटसमा नेपालमा बिताएको दुई वर्ष अविस्मरणीय रहेको उल्लेख गर्दै, नेपाली क्रिकेट टिम, व्यवस्थापन, समर्थक, खेलाडी र सम्पूर्ण नेपालीलाई धन्यवाद व्यक्त गरेका छन् ।

देसाईको बिदाई सन्देश

देसाईले आफ्नो सन्देशमा भनेका छन्, "यो केवल बिदाई मात्र होइन, हार्दिक धन्यवाद पनि हो ।" उनले २०२३ जनवरी १० मा नेपालको क्रिकेटमा स्थायी प्रभाव पार्ने लक्ष्यसहित जिम्मेवारी सम्हालेको उल्लेख गर्दै, एशिया कप र विश्व कप क्वालिफायरका रोमाञ्चक क्षणहरू स्मरण गरेका छन् ।

उनले खेलाडीहरूलाई सधैं उत्कृष्टता अपनाउन आग्रह गर्दै, "तिमीहरूले लाखौँको सपना बोकेका छौ। सधैं पृथक रहनु, बल खेल्ने मानसिकता अंगाल्नु र बाउन्ड्रीहरू निकालिरहनु," भनेका छन् ।

कर्मचारीहरूप्रति कृतज्ञता व्यक्त गर्दै उनले पर्दा पछाडिको मेहनतको उच्च प्रशंसा गरेका छन् । फ्यानहरूको अडिग समर्थनले नेपाली क्रिकेटलाई बलियो बनाएको उल्लेख गर्दै उनले नेपाल क्रिकेट संघको व्यवस्थापनलाई एकताबद्ध रहन आग्रह गरेका छन् ।

नेपाललाई दोस्रो घरको रूपमा लिएको बताउँदै उनले लेखेका छन्, "यहाँको क्रिकेट केवल खेल मात्र होइन, यो एउटा भावना हो जसले राष्ट्रलाई एकताबद्ध बनाउँछ ।"

यस्तो छ देसाईले फेसबुकमा लेखेको स्टाटस:

प्रिय नेपाल,

यो एउटा बिदाई मात्र होइन, हार्दिक धन्यवाद पनि हो । 

जनवरी १०, २०२३ मा, मैले म नेपालको क्रिकेटमा एउटा स्थायी प्रभाव छोड्ने कथा बनाउनेछु भन्ने सोचेर नेपाल क्रिकेट संघ नेपालसँगको अवसरलाई उत्साह र उद्देश्यका साथ अँगाले ।  

यी दुई वर्ष अविस्मरणीय रहे, जसमा प्रिय क्षणहरू र साझा कोशेढुङ्गा थिए । एशिया कप क्वालीफिकेशनको समयमा टीयू ग्राउण्डमा, जहाँ दर्शकहरू रुखमा चढेर र छाता लिएर उभिएका थिए । मुलपानीमा विश्व कप क्वालीफिकेशनको समयमा, जहाँ भिडको उत्साह अतुलनीय थियो, नेपालको उत्साह र सहनशीलता परिभाषित भयो ।

यस यात्रामा थुप्रै आरोह अवरोहहरू थिए तर पनि म नेपाल क्रिकेट संघको व्यवस्थापन, चयनकर्ता, खेलाडी, प्रशिक्षक, अधिकारी, स्कोरर, मैदानकर्मी, क्यामेराम्यान, कमेन्टेटरहरू, र मेरो क्याप्टेन रोहित पौडेलसँग मिलेर सानो भूमिका निभाउन पाउँदा आभारी छु । हरेक व्यक्तिले आफ्नो तर्फबाट योगदान पुर्याएको छ र हामीले बनाएको त्यो सौहार्दलाई म गहिरो मूल्याङ्कन गर्छु ।

खेलाडीहरूलाईः

तिमीहरूले लाखौँको सपना बोकेका छौ । सधैं पृथक रहनु, एक–एक बल खेल्ने मानसिकता अंगाल्नु र बाउन्ड्रीहरु निकालिरहनु । ‘ह्यापी ड्रेसिङ रुम’को दर्शन जसमा सम्बन्ध, खुलापन, एकता र जिम्मेवारी छ, त्यो सँधै तिमीहरूको शक्ति हुनेछ ।

कर्मचारीहरूलाईः

तपाईँहरुको पर्दा पछाडिको निरन्तरको मेहनत अमूल्य छ । मेरो मागहरू केवल हामीलाई उत्कृष्टता तर्फ प्रोत्साहित गर्नका लागि थिए । मेरो साथमा उभिनुभएकोमा धन्यवाद ।

फ्यानहरुलाईः

तपाईँहरुकाे अडिग समर्थन हाम्रो सबैभन्दा ठूलो बल हो । यस टोलीमा विश्वास राखिरहनु ।

नेपाल क्रिकेट संघको व्यवस्थापनलाईः

मलाई नेतृत्वको अवसर दिनुभएकोमा धन्यवाद। आधार तयार छ! एकजुट रहनु र नेपाललाई गर्वित राख्नु ।

नेपालीलाईः

पाल मेरो लागि घरभन्दा बाहिरको घर भएको छ। यहाँको क्रिकेट केवल एक खेल मात्र होइन, यो एउटा भावना हो जसले यो राष्ट्रलाई एकताबद्ध बनाउँछ !

जय नेपाल