अभद्र व्यवहार कसूरमा आशिका तामाङ पक्राउ

आशिका तामाङलाई अभद्र व्यवहार कसूरमा काठमाडौंको स्वयम्भूबाट प्रहरीले पक्राउ गरेको छ ।

प्रहरी वृत्त स्वयम्भूको टोलीले बुधबार दिउँसो उनलाई पक्राउ गरी जिल्ला प्रहरी परिसर काठमाडौंमा बुझाएको हो । जिल्ला प्रहरी परिसरका एसपी नवराज अधिकारीका अनुसार आशिका तामाङविरुद्ध पशुपति क्षेत्र विकास कोषले उजुरी दिएको थियो ।

उजुरीका आधारमा प्रहरी वृत्त गौशालाले अनुसन्धान गर्न जिल्ला प्रशासन कार्यालयबाट अनुमति लिएर उनलाई पक्राउ गरेको हो । उजुरीमा तामाङले कोष परिसरमा गएर कर्मचारीलाई गालीगलौज गरेको र प्रहरीलाई समेत गाली गर्दै धकेलाधकेल गरेको आरोप रहेको प्रहरीले जनाएको छ ।

पक्राउपछि उनलाई थप अनुसन्धानका लागि प्रहरी वृत्त गौशालामा पठाइएको एसपी अधिकारीले जानकारी दिए ।