वीरगञ्ज भन्सारको राजस्व सङ्कलन प्रगति सन्तोषजनक १० महिनामा रु १ खर्ब ९९ अर्ब राजस्व सङ्कलन

वीरगञ्ज भन्सार कार्यालयले चालु आर्थिक वर्षको पहिलो १० महिनामा रु एक खर्ब ९९ अर्ब ४० करोड राजस्व सङ्कलन गरेको छ ।

यो रकम विभागले दिएको लक्ष्यको ८९ दशमलव ३५ प्रतिशत रहेको कार्यालयले जनाएको छ । भन्सार विभागले उक्त अवधिका लागि रु दुई खर्ब २३ अर्ब १८ करोड राजस्व सङ्कलन गर्ने लक्ष्य निर्धारण गरेको थियो । कार्यालयका सूचना अधिकारी उदयसिंह विष्टका अनुसार चालु आर्थिक वर्षमा राजस्व सङ्कलन सन्तोषजनक रहेको बताए । उनले पेट्रोलियम पदार्थ, सवारीसाधन तथा तिनका पार्टपुर्जाको आयातलाई राजस्वको मुख्य स्रोतका रूपमा रहेको जनाएकाे छ ।

वीरगञ्ज नाका मुलुककै प्रमुख व्यापारिक प्रवेशद्वार भएकाले यहाँबाट हुने आयातले राष्ट्रिय राजस्वमा ठूलो योगदान पुर्‍याउँदै आएको छ । भन्सार विभागले चालु आर्थिक वर्षभरिका लागि वीरगञ्ज भन्सार कार्यालयलाई रु दुई खर्ब ७३ अर्ब ३९ करोड राजस्व सङ्कलन गर्ने वार्षिक लक्ष्य दिएको छ । अझै दुई महिना बाँकी रहेकाले लक्ष्य नजिक पुग्ने अपेक्षा कार्यालयले गरेको छ ।

कार्यालयका अनुसार चालु आवको साउनमा रु १८ अर्ब ४४ करोड, भदौमा रु २० अर्ब ७३ करोड, असोजमा रु १९ अर्ब ९ करोड, कात्तिकमा रु १७ अर्ब ३३ करोड, मङ्सिरमा रु २० अर्ब ८० करोड, पुसमा रु २० अर्ब २० करोड, माघमा रु १८ अर्ब ९२ करोड, फागुनमा रु १९ अर्ब ३४ करोड, चैतमा रु २२ अर्ब ८२ करोड तथा वैशाखमा रु २१ अर्ब ७४ करोड राजस्व सङ्कलन भएको जनाएको छ ।