इजाजत नवीकरण नगराउने स्वास्थ्य संस्थालाई कारबाही गर्ने स्वास्थ्य मन्त्रालयको तयारी

काठमाडौँ । स्वास्थ्य तथा जनसंख्या मन्त्रालयले इजाजत पत्र नवीकरण नगरेका स्वास्थ्य संस्थाहरूमाथि कारबाही गर्ने तयारी गरेको छ ।

मन्त्रालयले निजी, सहकारी, गैरसरकारी तथा सामुदायिक अस्पताल र स्वास्थ्य संस्थाहरुलाई इजाजत पत्र नवीकरण गरेर मात्र सञ्चालन गर्न निर्देशन दिएको छ ।

कतिपय गैरसरकारी तथा सामुदायिक स्तरका संस्थाहरु नवीकरण बिना सञ्चालनमा आएको उजुरीपछि मन्त्रालयले परिपत्र जारी गरेको हो । मन्त्रालयले मापदण्डअनुसार सञ्चालनमा नआएका केही संस्थाहरुबारे पनि उजुरी प्राप्त गरेको छ ।

स्वास्थ्य तथा जनसंख्या मन्त्री प्रदीप पौडेलले स्वास्थ्य संस्थाहरुले मापदण्ड पालना गरेको सुनिश्चित गर्न सम्बन्धित अधिकारीहरुलाई निर्देशन दिएका छन् । जनस्वास्थ्य सेवा नियमावलीमा इजाजतपत्र बिना स्वास्थ्य सेवा उपलब्ध गराउन नपाइने व्यवस्था छ । तर, केही संस्थाले इजाजतपत्र नलिई सेवा सञ्चालन गरेको उजुरी आएपछि मन्त्रालयले पत्राचार गरी निर्देशन दिएको हो ।

मन्त्रालयका प्रवक्ता डा. प्रकाश बुढाथोकीले इजाजत पत्र नवीकरण नगरी सञ्चालनमा रहेका स्वास्थ्य संस्थाहरुको अनुगमन गरी मापदण्ड पूरा नगरेमा कारबाही गरिने बताएका छन् ।

मन्त्रालयले स्वास्थ्य सेवाको गुणस्तर र विश्वसनीयता कायम राख्न अनुगमनलाई थप कडा पार्ने जनाएको छ ।