७ बानी, जुन कम उमेरमै छालामा बुढ्यौलीपन ल्याउने कारण बन्न सक्छन्

आफूलाई उमेरभन्दा छिट्टै बुढो देखियोस् भन्ने चाहना कसैको हुँदैन । बुढ्यौली प्राकृतिक प्रक्रिया हो र उमेरसँगै शरीर तथा छालामा विभिन्न परिवर्तन देखिनु स्वाभाविक मानिन्छ ।

उमेर बढ्दै जाँदा छालामा रहेको कोलाजेन र इलास्टिन फाइबर कमजोर बन्दै जान्छन्, जसका कारण छालामा चाउरीपना, सुख्खापन तथा झोल्लिने समस्या देखिन थाल्छ । यद्यपि केही व्यक्तिमा यस्ता लक्षणहरू कम उमेरमै देखिन सक्छन् । स्वास्थ्य विज्ञहरूका अनुसार जीवनशैलीसँग सम्बन्धित केही गलत बानीले छालामा समयअघि नै बुढ्यौलीपनको असर देखिन सक्छ । धूम्रपानलाई समयपूर्व बुढ्यौलीको प्रमुख कारणमध्ये एक मानिन्छ । धूम्रपानले छालामा पुग्ने रक्तसञ्चारलाई कम गरिदिन्छ र कोलाजेन तथा इलास्टिनलाई क्षति पुर्‍याउँछ । यसले छालाको प्राकृतिक चमक हराउनुका साथै चाउरीपना छिट्टै देखापर्न सक्छ । त्यस्तै, पर्याप्त निद्रा नलिँदा शरीरमा कोर्टिसोल हर्मोनको स्तर बढ्ने गर्छ, जसले कोलाजेनलाई कमजोर बनाउँछ । निद्राको कमीले छालाको प्राकृतिक मर्मत प्रक्रिया प्रभावित हुने भएकाले दैनिक सातदेखि नौ घण्टासम्मको गुणस्तरीय निद्रा आवश्यक मानिन्छ ।

शरीरमा पानीको कमी हुँदा पनि छालाको स्वास्थ्यमा प्रत्यक्ष असर पर्छ । पर्याप्त पानी नपिउँदा छाला सुख्खा, निस्तेज र थकित देखिन सक्छ । त्यसैले शरीरलाई हाइड्रेटेड राख्न पर्याप्त मात्रामा पानी पिउनु आवश्यक हुन्छ । यसैगरी, अस्वस्थ खानपानले पनि छालालाई नकारात्मक असर पुर्‍याउँछ । अत्यधिक चिल्लो, प्रशोधित तथा पोषण कम भएका खाद्य पदार्थको सेवनले छालामा सुन्निने समस्या बढाउन सक्छ भने समयअघि नै चाउरीपना देखिने जोखिम पनि बढाउँछ । स्वस्थ छालाका लागि फलफूल, हरियो तरकारी, फाइबर, प्रोटिन र स्वस्थ बोसोयुक्त आहार उपयोगी मानिन्छ ।

अत्यधिक तनाव पनि छालाको शत्रुका रूपमा लिइन्छ । लामो समयसम्म तनावमा रहँदा शरीरमा हुने हर्मोनल परिवर्तनले छालाको स्वास्थ्यमा प्रत्यक्ष असर पार्छ । तनावले छालालाई भित्रैदेखि कमजोर बनाउने भएकाले उमेरभन्दा पहिले बुढ्यौलीका लक्षण देखिन सक्छन् । त्यस्तै, छालाको उचित हेरचाह नगर्दा पनि समस्या बढ्न सक्छ । नियमित सफाइ, मोइस्चराइजिङ तथा सूर्यको किरणबाट सुरक्षा नगर्दा छालामा जलन, सुख्खापन र चाउरीपना बढ्ने सम्भावना रहन्छ ।

प्रदूषणको अत्यधिक सम्पर्कमा रहनु पनि छालाका लागि हानिकारक मानिन्छ । धुलो, धुवाँ तथा अन्य प्रदूषक तत्वले छालामा अक्सिडेटिभ तनाव बढाउँछन्, जसले छालाका कोषिकालाई क्षति पुर्‍याएर समयअघि नै बुढ्यौली निम्त्याउन सक्छ ।

विशेषज्ञहरूका अनुसार स्वस्थ जीवनशैली अपनाउने, सन्तुलित आहार खाने, पर्याप्त निद्रा लिने, तनाव व्यवस्थापन गर्ने र नियमित छालाको हेरचाह गर्ने बानीले छालालाई लामो समयसम्म स्वस्थ, आकर्षक र जवान देखाउन मद्दत पुर्‍याउँछ ।