जाडोबाट जोगिन अपनाउनुपर्ने उपायहरू

शीतलहर, चिसो हावा र हिउँदे मौसमले गर्दा शरीरलाई विभिन्न प्रकारका स्वास्थ्य समस्या उत्पन्न गर्न सक्छ । जाडो मौसममा विशेषगरी बालबालिका, वृद्धवृद्धा र कमजोर स्वास्थ्य अवस्थाका व्यक्तिहरू बढी प्रभावित हुन्छन् । स्वास्थ्यलाई सुरक्षित राख्न र चिसोको प्रभावबाट बच्न निम्न उपायहरू अपनाउन सकिन्छ ।

• तातो लुगा लगाउने

जाडोबाट जोगिन सबैभन्दा पहिला तातो र बाक्लो लुगा लगाउनु जरूरी छ । स्वेटर, ज्याकेट, मोजा, पञ्जा, टोपी र मफलर अनिवार्य रूपमा लगाउनुपर्छ । शरीरको तापक्रमलाई स्थिर राख्न र हावा छिर्न नदिने किसिमका कपडा प्रयोग गर्नु उपयुक्त हुन्छ ।

• शरीरलाई तातो बनाउने पेय पदार्थ पिउने

तातो चिया, कफी, सुप, अदुवाको रस वा झोल पदार्थ पिउँदा शरीरलाई तातो राख्न सहयोग गर्छ । यी पेय पदार्थले शरीरलाई चिसोबाट बचाउनका साथै प्रतिरक्षा प्रणाली बलियो बनाउन पनि मद्दत गर्छ ।

• सही आहार सेवन गर्ने

जाडोमा तातो र पौष्टिक आहार खानु अत्यन्तै महत्त्वपूर्ण हुन्छ। प्रोटिनयुक्त खानेकुरा (जस्तै मासु, गेडागुडी), हरियो तरकारी, सागपात, च्याउ, बदाम, मह, तिल र घ्यू जस्ता परिकारले शरीरलाई चिसोबाट बचाउन सहयोग पुर्‍याउँछ ।

• घर भित्रै बस्ने र चिसो हावाबाट बच्ने

शीतलहर र चिसो हावाबाट बच्न घरभित्रै बस्ने प्रयास गर्नुहोस् । घरभित्र तापक्रम सन्तुलनमा राख्न विद्युतीय हिटर, आगो ताप्ने चुलो वा कम्बलको प्रयोग गर्न सकिन्छ ।

• नियमित व्यायाम गर्ने

जाडोमा शरीरलाई सक्रिय राख्न व्यायाम आवश्यक हुन्छ । बिहानको समयमा घाममा हिँड्ने, योग गर्ने, दौडधुप गर्ने वा हल्का स्ट्रेचिङ जस्ता व्यायामले शरीरको रक्त प्रवाहलाई सन्तुलनमा राखेर शरीरलाई तातो बनाउँछ ।

• चिसो पानीबाट जोगिने

जाडो मौसममा चिसो पानीले नुहाउने वा हातखुट्टा धुने गर्दा छालामा चिसोको असर पर्न सक्छ। तातो पानीको प्रयोग गर्नु उचित हुन्छ।

• छालाको स्याहार गर्ने

जाडोमा छाला सुख्खा हुने समस्या हुन्छ। यसका लागि लोसन, क्रिम वा जेली जस्ता पदार्थ प्रयोग गर्नुपर्छ । यसले छालालाई चिसोबाट बचाउनुका साथै चाउरी पर्नबाट पनि जोगाउँछ ।

• अत्यधिक मदिरा सेवनबाट बच्ने

मदिरा सेवनले शरीरलाई अल्पकालीन रूपमा तातो महसुस गराए पनि लामो समयका लागि यसले चिसो सहने क्षमतामा ह्रास ल्याउन सक्छ । त्यसैले जाडोमा अत्यधिक मदिरा सेवन गर्नु राम्रो हाेइन् ।

• मौसमअनुसार योजना बनाउने

चिसो बढ्ने समयका लागि विशेष योजना बनाएर यात्रा गर्ने वा अन्य कामकाज गर्ने प्रयास गर्नुहोस् । बिहान र साँझको समयमा अत्यधिक चिसो हुने भएकाले सकेसम्म यी समय घरभित्रै बस्नु उपयुक्त हुन्छ ।

• प्रतिरक्षा प्रणाली बलियो बनाउन ध्यान दिने

भिटामिन सी युक्त फलफूल (जस्तै सुन्तला, कागती), अदुवा, बेसार र तुलसीजस्ता प्राकृतिक पदार्थको सेवनले शरीरलाई रोग प्रतिरोधात्मक बनाउन मद्दत गर्छ ।

जाडो मौसमलाई स्वस्थ र सुरक्षित रूपमा रहन उपयुक्त पहिरन, सन्तुलित आहार, नियमित व्यायाम र सही जीवनशैली अपनाउन जरूरी छ । विशेषगरी बालबालिका र वृद्धवृद्धाहरूको हेरचाहमा विशेष ध्यान दिन आवश्यक हुन्छ । यी उपायहरूको पालन गर्दा जाडोले निम्त्याउने जोखिमलाई न्यून बनाउन सकिन्छ ।