सहकारी बचतकर्ताको एक करोड फिर्ता, ५४७ जनासँग अध्यक्षले गरे जेलबाटै मिलापत्र

इमेज बचत तथा ऋण सहकारी संस्थाका ५४७ जना बचतकर्तालाई रु १ करोड फिर्ता गरिएको छ ।

संस्थाका अध्यक्ष देवकुमार नेपालीसँग मिलापत्र गरेपछि एक लाख रुपैयाँसम्मका बचतकर्ताको रकम फिर्ता प्रक्रिया अघि बढाइएको हो । ढोरपाटनका ९२ बचतकर्ताले ३७ लाख रुपैयाँका चेक बुझेका छन् भने गल्कोट नगरपालिकाका १४७ जना बचतकर्ताले रकम फिर्ता पाएका छन् ।

इमेज पीडित सङ्घर्ष समिति गल्कोट-बुर्तिवाङका संयोजक मञ्जु शर्मा चालिसे का अनुसार दुई दिनमा कुल रु १ करोड बचतकर्तालाई फिर्ता गरिएको छ । इलाका प्रहरी कार्यालय हरिचौर र जनप्रतिनिधिको रोहबरमा बचतकर्ताको रकम फिर्ता गरिएको हो। बाँकी बचतकर्ताको रकम फिर्ताका लागि मिना ग्रुप कम्पनी प्रालिसँग सहकार्य गर्न सम्झौता गरिएको चालिसेले बताइन् ।

जेलबाटै मिलापत्र

गत पुस २६ गतेसम्म सहकारी ठगी मुद्दामा थुनामा रहेका अध्यक्ष देवकुमार नेपालीसँग ५४७ जनाले मिलापत्र गरेका छन् ।

उनीहरूलाई नेपालीको घरायसी सम्पत्तिबाट पाउनुपर्ने रकम दिइएको भन्दै बिगो दाबी नगर्ने गरी मेलमिलाप गरिएको हो । यससँगै सहकारीमा ठगिएको २३ करोड ७५ लाख ४२ हजार ३४० रुपैयाँमध्ये केही रकम फिर्ता भइसकेको छ । मुलुकी फौजदारी संहिता २०७४ को दफा ११७ अनुसार मिलापत्र गरिएको जिल्ला अदालत बागलुङले आदेश दिएको छ ।

सहकारीका अध्यक्ष देवकुमार नेपाली पुर्पक्षका लागि हाल थुनामा छन् ।