होमपाइपको खाल्टोमा मोटरसाइकल खस्दा पर्सामा एकको मृत्यु, एक घाइते

पर्साको पटेर्वासुगौली गाउँपालिका वडा नम्बर ४, कर्वोला चोकमा होमपाइप राख्नका लागि खनीएको खाल्टोमा मोटरसाइकल खस्दा एक जनाको मृत्यु भएको छ भने अर्का एक जना गम्भीर घाइते भएका छन् ।

मृत्यु हुनेमा सखुवाप्रसौनी गाउँपालिका वडा नम्बर २, जमुनिया टोलका २३ वर्षीय सुदर्शन चौधरी रहेका छन् । उनी सवार ना २८ प ३८१९ नम्बरको एफजेड मोटरसाइकल गएराती पथरैयाबाट श्रीपुर पँचगावातर्फ जाँदै गर्दा खाल्टोमा खसेको थियो । दुर्घटनामा सोही ठाउँका २४ वर्षीय दिपेन्द्र राय थारु गम्भीर घाइते भएका छन् ।

घटनाको जानकारी पाए लगत्तै इलाका प्रहरी कार्यालय पटेर्वासुगौलीबाट पुगेको टोलीले घाइते दुवैलाई उद्दार गरी उपचारका लागि वीरगंजको अलएस न्यूरो अस्पताल पठाएको थियो । उपचारका क्रममा सुदर्शनको मृत्यु भएको र दिपेन्द्रको अवस्था गम्भीर रहेको इलाका प्रहरी कार्यालय पटेर्वासुगौलीका इन्स्पेक्टर प्रकाश थापाले जानकारी दिएका छन् ।

प्रहरीले दुर्घटनामा प्रयोग भएको मोटरसाइकललाई नियन्त्रणमा लिई घटनाबारे आवश्यक अनुसन्धान गरिरहेको छ ।